भांगरभूंय | प्रतिनिधी
आमठाण्यां 30 दिसांचो सांठो; पियेवपाच्या उदकाचें संकश्ट उबें, पावसान वाडयलो हुस्को
भांगरभूंय । प्रतिनिधी
दिवचलः अंजूणें धरणांतलें उदक सामकेंच आटपाक पावलां. पावस नाशिल्ल्यान हुस्को वाडला. बेगीन पावस आयलो ना जाल्यार उदकाची समस्या गंभीर जावपाक शकता. सध्या आमठाणे धरणांत 30 दीस पावतलें, इतलोच उदकाचो सांठो आसा.
साळ न्हंयेंतल्यान पंपींग करून आमठाणें धरणांत उदक सांठयतात. ताचो उपेग अस्नोडें प्रकल्पा खातीर जाता. दिवचल आनी व्हाळवाट न्हंयेंतल्या उदकाची पातळी हिसपा भायर देंवल्या. व्हाळवाट न्हंयेंतल्यान सांखळी पडोशें प्रकल्पा खातीर उदकाची पुरवण करतात. अस्नोडें प्रकल्पांत तिळारीचें उदक येता, तें अजून चालू आसा.
पावस नाशिल्ल्यान पियेवपाच्या उदकाचो प्रस्न गंभीर जाला जाल्यार दुसरे वटेन शेतकार हुस्क्यांत पडल्यात. सध्या साळ पंपींग स्टेशनाक लागून फावोश्या उदकाची पुरवण जाता. मजगतीं, 22 जूनाच्यान दिवचल म्हालांतल्या विवीध वाठारांनी उदका पुरवणेचेर परिणाम जावपाक शकता.
तिराळी धरणांतल्यान येवपी उदक विवीध वाठारांनी दिवपा संबंदांत विचार चल्ला. पर्यायी उदक वेवस्थे खातीर शिंपणावळ खात्याची धांवपळ चल्ला, तशेंच उदका पुरवण खात्यानूय आपले तरेन यत्न सुरू केल्यात.
पडोशें प्रकल्प बंद करूंक ना जाल्यार मर्यादीत उदका पुरवण चालू आसा. मॉन्सूना आदीं बांदाच्यो फळयो काडिल्लो, मात पावसून नाशिल्ल्यान अस्नोडें, सांखळी, दिवचल वाठारांतल्यो फळयो परतून घातल्यात. अस्नोडेंच्या पार न्हंयेंत आतां फावोसो उदकाचो सांठो निर्माण जाला.
मुख्यमंत्री डॉ. प्रमोद सावंत हांणी उदका पुरवणे संबंदांत सगळे तरेची जतनाय आनी पर्याय तशेंच गरजेची उपाय येवजण आंखपाचे आदेश दिल्यात. तिळारी तशेंच आमठाणें धरणांतलें उदक वापरपा विशींय नियोजन करपाचेरूय चर्चा केल्या. खात्याच्या अधिकारी वर्गा कडेन चर्चा करून उपाय येवजण करपा संबंदांत सुचोवण्यो केल्यात, अशें आमदार डॉ. चंद्रकांत शेट्ये हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
