भांगरभूंय | प्रतिनिधी
भांगरभूंय । प्रतिनिधी
पणजीः अंजुणे, पंचवाडी आनी साळावली धरणांतलें उदक दिसान दीस उणें जायत आसा. मात जें उदक आसा तें पावसाळ्या मेरेन पावतलें. लोकांनी ते विशीं भिरांत बाळगुवची न्हय अशें उदका स्रोत खात्याचे मुखेल अभियंता प्रमोद बदामी हाणे सांगलां.
पंचावाडीच्या म्हैसाळ धरणांत सद्या 4.5 टक्के उदक आसा. अंजुणे धरणांत 9.2 जाल्यार साळावली धरणांत 23.8 टक्के उदका साठो आसा. गोंयांत मान्सून पावपाक अदूं चार ते पांच दीस चड लागतले अशें हवामान खात्यान जाहीर केल्ल्यान. धरणांत आशिल्लो उदका साठो पावतलो काय ना हे विशीं लोकांच्या मनांत दुबाव आसा. मात अंजुण्यांतलें उदक 30 दीस आनी साळावली धरणातलें उदक 40 दीस मेरेन पावपा इतलें आसा अशें बदामीन सांगलां.
पंचवाडीच्या धरणांतलें उदक फुडले सात-आठ दीस मेरेन जाय तितलें आसा. ताचे पयलीं ओपा प्रकल्पांतल्यान पंचवाडी धरणांत उदक सोडटले. सध्या ओपा प्रकल्पांत म्हादयचें 70 एमएलडी, खण खंदकांतल्यान 30 एमएलडी आनी गांजेंतल्यान 17 एमएलडी उदक सोडटात. ताका लागून ओपाची उदकाची पातळी वाडल्या अशें तांणे सांगलें.
फाटल्या कांय दिसां सावन राज्यांतल्या वेगवेगळ्या वाठारांत उदकाचो उणाव जावपाक लागला. ‘हर घर जल’ येवजणे खाला सरकारान सगळ्या घऱांक नळ कनेक्शनां दिल्यांत मात कांय नळांक उदक येनाशिल्ल्यान लोकां मदीं निर्शेणी आनी तिडक आसा. कांय वाठारांत उदक येना देखून लोकांक टॅन्करांचेर निंबून रावचें पडटा. बांदकाम खात्याच्या उदका पुरवण कार्यालयांनी वचून कांय राजकी फुडारी आनी लोक अधिकाऱ्यांक उदका खातीर घेराव घालपाक लागल्यात. पावस सुरू जावंन धरणांतलो उदका साठो वाडमेरेन उदकाची समस्या आसतली अशें दिसपाक लागलां.
धरणांनी आशिल्लो उदका साठो
साळावली : 23.8 टक्के
अंजुणे : 9.2 टक्के
आमठाणे : 51-8 टक्के
पंचवाडी : 4.5 टक्के
चापोली : 44. 7 टक्के
गावणे : 40.1 टक्के
तिळारी : 96 टक्के
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
