अंजली किणी – युवा पिळगेचें पर्जळपी नखेत्र

भांगरभूंय | प्रतिनिधी

सा तत्यान बरोवपी लेखक थोडे. केन्नाय पसरो वा भाजी-पाव, च्या चें हॉटेल उकतें करता, ताचेर भरंवसो दवरूं येता? युवा मळार उत्साह, उत्सव बी खूब आसा. पूण पुरस्कार मेळटकच बरोवप बंद करपी चड अशें एका लेखकान फाटीं बरयल्लें. सातत्यान बरोवपी थोडे आसात. बंगळूरची अंजली किणी ही कोंकणी कवयित्री सातत्यान शिस्तीन बरोवपी.
अंजलीचें मूळ नांव स्मृती. अंजली हें नांव साहित्य निर्मिती खातीर घेतलां. मूळचें केरळचें. सद्या लग्ना उपरांत बंगळूरांत रावता. काव्यांजली (2018) आनी मनोगत (2025) हे अंजलीचे उजवाडाक आयिल्ले झेले. खेरीज ताचे ब्लॉग आसात. बी कॉम एलएल बी मेरेनचें शिकप कोचींतूच जालें. पयली कविता स्कूलांत आसतना बरयली ती मल्याळम भाशेंत. तातूंत बक्षीस मेळयलें.
आपणाक चली जातकच ताका खेळयतना कोंकणी कवितांची, गितांची गरज उप्रासली. ती भागोवपाक आपणे कविता बरयल्यो. मणियां सोरू, हें बालकवितांचें पुस्तक हातूंतल्यान उजवाडाक आयलें. हाका कोंकणी अकादेमीचो पुरस्कार मेळ्ळा.
अंजलीच्या कवितांचो घाट चिंतनात्मक आनी मात्सो आध्यात्मिक. मनोगत झेल्यांत पयली कविता आसा ती हांव कोण?
पंचभूत एकमेळि जावन
जालेलें शरीर वे हांव?
हे कवितेंत हांव कोण हें खोलायेन सोदतना कवयित्री अखेरेक म्हणटा –
की हांव एक आत्मा
विना आदि आनी अंत?
अंजलीच्या साहित्यांत सगळे कडेन खोलाय, स्पश्टता, विचार, संदेश हे झरे खुळखुळटना दिसतात. अंजलीच्या पिरायेच्या मानान ताच्यो कविता पक्व आनी चिंतनशील कालेतीच्यो आसात. सुके शब्दांचे बोमाडे काडपाक ताका रस ना.
आभारी जा तूं, ही कविता म्हाका खूब आवडली. आपणा परस दुसऱ्या कडेन चड आसा हें पळोवन खंती जावपाची वृत्ती कांय जाणांची आसता. पूण आपणा कडेन जें जें कितें आसा ते विशीं जिणेंत कृतज्ञ रावचें असो संदेश दिवपी ही कविता. म्हजे कडेन भलायकी आसा, पोट भरून खावपा जेवपाक आसा, समाधान आसा म्हणटकच आऩीक कितें जाय, जें दिलां ते खातीर तृप्त जावन कृतज्ञताय जाय अशें कवयित्री अंजली किणी सांगता. ताच्या कवितांनी खंयच रड, पिरंगण, नकारात्मकता ना. भोंवतणी जें जें कितें चललां ते विशीं प्रस्न आसात. अशें कित्याक? हे प्रस्न कवयित्रीक छळटात. ते कलात्मक रितीन कशे मांडप हाची जाण लेखिकेक आसा.
अंजलीक कोंकणी आनी इंग्लीश दोनूय भासांचेर प्रभुत्व. इंग्लीश कविताय बऱ्यो आसात. वूमन्स इरा ह्या नामनेच्या इंग्लीश नेमाळ्यांत त्यो कविता उजवाडाक आयल्यात.
साहित्य अकादेमी पुरस्कार मेळोवपी कवी आर एस भास्कर हांणी मनोगत कवितां झेल्याक प्रस्तावना बरयल्या. ते म्हणटात – अनलंकृत वाक्यांनी आनी सोंप्या उतरांनी गुंतिल्ल्यो उपदेशात्मक संदेश दिवपी कविता हे कवयित्रीची भास हाताळपाची निपुणताय व्यक्त करतात.
भास्करबाबान अंजलीच्या काव्याचो आपरोस ह्या एका वाक्यान दिला.
सत्संग नांवाची अंजलीची कविता सत्याकडेन वचपाची वाट दाखयता. अस्वस्थ, अशांत, अस्थिर मनशाक सत्याचो नांगरूच थीर करता हो संदेश हे कवितेंत दिसता. सत्यनिष्ठता हो कितल्याशाच समस्यांचेर उपाय आनी तोडगो आसा अशें कवयित्री मानता. जाणटा.
कृत्रिम बुद्धी हे कवितेंत वाडत आशिल्ल्या ए आय आनी डिजिटल तंत्रगिन्यानाचो फुडार हाचेर उजवाड घालून भाष्य केलां. विचारांची वाल माथाळ्या खाला बारा चार वळींच्यो ल्हान कविता आसात. तांचे विशय वेगवेगळे. मनशाच्या सुवार्थाचेर, नमळायेचो गूण आपणावपाचेर, उंचायेर पावल्यार बाग घेवन पांय जमनीर दवरपाचेर, खोस भितर आसा ह्या संदेशाचेर ह्यो कविता आसात.
सगळे कडेन सोदून भोंवन
संतोश खंय की मेळटा
दोळेय धांपून भितर चोयतेर
तो भितरीची म्हूण कळटा
हे कवितेंत खोस, आनंद, समाधान, शांती आपल्या भितरूच आसता थंय लक्ष दिल्यार ती मेळटा, भितल्लो रोस चाखचो असो आध्यात्मिक सूर वाजता.
तुजें मोल, हे कवितेंत कवयित्री अंजली वाचकाक अनंत ब्रह्मांडांतली ताची सुवात, ल्हानविकाय दाखोवन दिता. ल्हान अणुरेणू येदो मनीस बेठोच फटासो मारता, झेत मारता. कुस्कुटायेद्या मनशान ह्या विश्वाच्या बोमाड्यांत आपली पात्रता राखून समजिकायेन जियेवचें अशें हे कवितेंत सांगलां.
हांव केवल एक स्त्री, हे स्त्रीकेंद्री कवितेंत अस्तुरी सांगता – हांव चुकूं येता हें मतींत दवर. म्हज्यांतूय अवगुण आसतात. हांव मूर्ती न्हय, हांव अबला न्हय अशे विचार मांडटना हांव सृश्टीचो, ईश्वर निर्मितीचो एक भाग अशें निमण्या कडव्यांत कवयित्री सांगता. काव्य प्रवाहांत ‘पानी कम चिनी ज़्यादा’ अशें खंयच ना. ही कविता सहजता आनी सादेपण घेवन झाडपिक्या मानकुराद आंब्यावरी पिकून आयल्या. कवितेंत उखलापेपण खंयच ना. जिणेच्या वेगवेगळ्या आयामां कडेन ही कवयित्री गंभीरतायेन पळेता. सुख- दुख्खां, चडटी- देंवती, बरें-वायट, जिणेची अथांगताय हांचो ती एकसारकी वेध थाव घेत आसा. तातूंत नमळाय आनी जिज्ञासूपण आसा.
अंजली किणीचो आनीक एक गुण म्हळ्यार ताच्यांत आशिल्ली चित्रां रेखाटन करपाची कला. कविता झेल्यांत सोबीत चित्रां पितारल्यांत तीं काव्य झेल्याक एक उंचाय हाडटा. जिबेवेली जतनाय ह्या सखाराम शेणवी बोरकार हांच्या म्हणींच्या पुस्तकाक अंजलीन मुखपृष्ठ आनी रेखाटनां काडल्यांत.
अंजलीन स्मृती ह्या नांवान भुरग्यां खातीर इंग्लीशींत एक पुस्तक बरयलां. तातूंत पांच काणयो आसात. साद्या दिसपी समस्यांवेले उपाय आमचे भितरूच आसतात ही देख लेखिकेन भुरग्यांक दिल्या. हातूंतलीं सोबीत चित्रां लेखिकेन काडल्यांत. ग्लॉसी रंगीत पेपरावेलीं हीं चित्रां आकर्शक दिसतात. इटी बिटी टेल्स ऑफ विजडम, ह्या नांवान हो काणयांचो झेलो उजवाडाक आयला.
कोंकणी भाशेविशीं उपाट प्रेम आशिल्ली ही कवयित्री नेमान, सातत्यान बरयता. आमची कोंकणी ह्या यु ट्यूब चॅनलावेल्यान व्यक्त जाता. तातूंत भुरग्यां खातीर काणयांचे विडियो, म्हणी आनी हेर भांडार आसा. आपले भितल्ली खदखद आनी तिडक आपूण कवितेंतल्यान कलात्मक रितीन रूपांतरीत करतां अशें लेखिका सांगता.
अंजलीक केरळांतल्या कोंकणी लोकगितांचो सांबाळ करपाची खूब उमेद. कोंकणी लोकगीत ह्या यु ट्यूब चॅनलाचेर दुर्मिळ कोंकणी लोकगितांचें डोक्युमेंटेशन, गायन आयकूंक मेळटा. अंजलीक इनामां, पुरस्कार खूब मेळ्ळ्यात. कोंकणीची आनिकूय निरंतर सेवा करपाक यशवंत पर्जळीत फुडार आंवडेतां.