भांगरभूंय | प्रतिनिधी
भारताचो युवा वेटलिफ्टर अचिंता शेउलीन राष्ट्रकूल खेळां सर्तींत विक्रमी कामगिरी करतना भारताक तिसरें भांगरा पदक मेळोवन दिलें.
20 वर्सां पिरायेच्या अंचितान 73 कील वजन गटांत भांगरा पदक जिखलें. राष्ट्रकूल केलां सर्तींत पश्चीम बंगालच्या ह्या खेळगड्यान 143 कील वजन उखल्लें.
हो हे सर्तींतलो नवो विक्रम थारलो. भारतान एकाच दिसा मेळयिल्लें हें दुसरें भांगरा पदक थारलें. ताचे पयलीं जेरेमी लालरिननुंगान दादल्यांच्या 67 कील वजन गटांत स्नॅच प्रकारांत 140 कील आनी क्लीन अॅण्ड जर्कांत 160 कील वजन अशें वट्ट 300 कील वजन उखलून भांगरा पदक जिखिल्लें.
शेउलीन स्नॅच प्रकारांत 143 कील वजन उखल्लें. हो हे सर्तींतलो विक्रम आसा. जाल्यार क्लीन अॅण्ड जर्कांत 170 कील सयत वट्ट 313 कील वनज उखलून नवीन विक्रम आपल्या नांवार केलो.
पोरूं जाल्ले संवसारीक पांवड्या वयले ज्युनियर वस्तादपण सर्तींत शेउलीन रुप्या पदक जिखिल्लें. शेउलीन आपल्या तिसऱ्या यत्नांत राष्ट्रकूलांत पदक मेळोवन दिवपी दोनूय लिफ्ट केलें. रुप्या पदक मलेशियाच्या ई हिदायत मोहम्मदाक जाल्यार कांश्या पदक कॅनडाच्या शाद डारसिग्रीक फावो जालें.
मलेशियाच्या खेळगड्यान 303 कील जाल्यार कॅनडाच्या खेळगड्यान 298 कील वजन उखल्लें.
ऑलिम्पीक पदक जैतिवंत मीराबाई चानून बायलांच्या 49 कील वजन गटांत भांगरा पदक जिखलें. बिंदियाराणी देवीन बायलांच्या 55 कील वजन गटांत आनी संकेत सरगर हाणें दादल्यांच्या 55 कील वजन गटांत रुप्या पदक जिखून दिलें.
गुरुराज पुजारीन दादल्यांच्या वेटलिफ्टिंग 61 कील वजन गटांत कांश्या पदक जिखलें. ते उपरांत भारताचो युवा जेरेमी लालरिनुंगान 67 कील वजन गटांत भांगरा पदक जिखून इतिहास घडयलो. ते उपरांत शिउलीन भांगरा पदक जोडलें.
वेटलिफ्टिंगेंत भारताचें हें 131वें पदक थारलें. भारता परस ऑस्ट्रेलियेन वेटलिफ्टिंगेंत चड पदकां जिखल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
