भांगरभूंय | प्रतिनिधी
कलाकार
असरानीन आपले सिने कारकिर्दींत सुमार 400 चित्रपटांनी अभिनय प्रतिभा दाखयल्या आनी आयज लेगीत तो चित्रपट उद्देगांत तेच उमेदीन काम करता.
सुमार पांच दशकां सावन आपल्या विनोदी अभिनयान सिनेमोगींक मोनेळ घालपी बॉलिवूडांतलो कलाकार असरानीचो जल्म 1 जाने 1941 दिसा जयपूर- राजस्थान हांगा एका सिंधी परिवारांत जालो. ताचें पुराय नांव गोवर्धन असरानी, पूण चित्रपटांत ताका ‘असरानी’ ह्या आडनांवान वळख मेळ्ळी. ताका चार भयणी आनी तीन भाव. भुरगेपणांतल्यान ताचें सपन नट जावपाचें आशिल्लें. सिने नट जावपाचें सपन घेवन असरानी 1963 वर्सा मुंबय आयलो, थंय किशोर साहू, हृषिकेश मुखर्जी सारक्या नामनेंच्या चित्रपट निर्मात्यां कडेन ताची भेट घडली. तांच्या सल्ल्यान असरानीन पुणेंच्या टेलीविजन इंस्टीट्यूट ऑफ इंडियांत प्रवेश घेतलो. 1966 वर्सा पुणे फिल्म इन्स्टिट्यूटांतल्यान अभिनयाचो अभ्यास पुराय जातकच असरानी मुंबय आयलो. फुडें 1967 वर्सा प्रदर्शीत जाल्ल्या ‘हरे कांच की चुडियाँ’ ह्या चित्रपटांतल्यान आपले चित्रपट कारकिर्दीची सुरवात केली.
हे मजगतीं असरानीन कांय गुजराती चित्रपटांनीय काम केलें. 1971 वर्सा प्रदर्शीत जाल्ल्या ‘मेरे अपने’ ह्या चित्रपटांतल्यान असरानी कांय प्रमाणांत प्रेक्षकांचे नदरेंत भरलो. 1973 वर्सा प्रदर्शीत जाल्ल्या ‘अभिमान’ ह्या चित्रपटांतल्यान असरानीक चित्रपट मळार आपली सुवात निर्माण करपाक येस आयलें. हृषिकेश मुखर्जी हाणें दिग्दर्शित केल्ल्या ‘अभिमान’ ह्या चित्रपटांत असरानीन अमिताभ बच्चनाच्या इश्टाची भुमिका केल्ली. तातूंतल्या बळिश्ट अभिनया खातीर असरानीक उत्कृश्ट सहाय्यक अभिनेत्याच्या फिल्मफेयर पुरस्कारा खातीरुय नामांकन मेळ्ळें.
1975 वर्सा प्रदर्शीत जाल्लो ‘शोले’ हो चित्रपट असरानीच्या सिनेमा कारकिर्दींतलो एक मार्गदर्शक फातर थारलो. रमेश सिप्पी हांणी दिग्दर्शित केल्ल्या ह्या चित्रपटांत असरानीन जेलराची भुमिका केल्ली. असरानीन उलयिल्लो हो संवाद… हम अंग्रेजों के जमाने के जेलर है…आयज लेगीत सिनेमा मोगी विसरूंक शकले नात. पूण येसस्वीपणाची रुच घेवपा खातीर ताका खर संघर्श करचो पडलो.
ऑल इंडिया रेडिओचेर आवाज दिवपी म्हणूनय ताणें काम केल्लें. 1977 वर्सा प्रदर्शीत जाल्ल्या ‘चला मुरारी हीरो बनने’ ह्या चित्रपटांतल्यान असरानीन चित्रपट दिग्दर्शनाच्या मळार प्रवेश केलो. ह्या सिनेमांत असरानीन मुखेल अभिनेतो म्हणून काम केलां जाल्यार अभिनेती बिंदिया गोस्वामी ताचे वांगडा आशिल्ली. विनोदान भरिल्लो हो सिनेमा प्रेक्षकांक खूब आवडलो. ‘चला मुरारी हीरो बनने’च्या येसा उपरांत असरानीन सलाम मेम साब, हम नही सुधरेंगे, दिल ही तो है, उडान अशे चित्रपट दिग्दर्शीत केले. असरानीक ‘आज की ताजा खबर’ आनी ‘बालिका वधू’ ह्या सिनेमांतल्या विनोदा खातीर फिल्मफेयर पुरस्कार फावो जाला. ‘आज की ताजा खबर’ ह्या सिनेमांत अभिनेत्री मंजू बंसलच्या तो मोगान पडलो आनी उपरांत दोगांयचें लग्न जालें.
ताणें आपल्या काळांतल्या सगळ्या व्हड कलाकारां वांगडा काम केलें. त्या काळांतलो सुपरस्टार राजेश खन्ना वांगडा 25 फिल्मांनी ताणें काम केलें. तशेंच बॉलिवूड मेगास्टार अमिताभ बच्चना वांगडा जायत्या चित्रपटांनी काम केलें.
2004 वर्साचे लोकसभा वेंचणुकेंत काँग्रेसींत येवन असरानीन राजकारणांत प्रवेश केलो, पूण राजकी मळार चड थीर जावंक शकलो ना. ‘सात कैदी ’ ह्या गुजराती चित्रपटांत ताणें केल्ल्या अभिनया खातीर गुजरात सरकारानय ताचो भोवमान केला. ‘कोशिश’ आनी ‘तेरी मेहरबानीयाँ ’ ह्या चित्रपटांनीय असरानीन गायन केलां.
असरानीन आपले सिने कारकिर्दींत सुमार 400 चित्रपटांनी अभिनय प्रतिभा दाखयल्या आनी आयज लेगीत तो चित्रपट उद्देगांत तेच उमेदीन काम करता.
——————————–
सुदिन वि. कुर्डीकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
