अँथनीबाब, पुराय देशाची परिस्थिती लक्षांत घेयात

भांगरभूंय | प्रतिनिधी

काँग्रेस आनी आयएनडीआय आघाडेन हालींच परतून एक फावट लोकसभेंत अराजक निर्माण करून आपलें खरें स्वरूप दाखयलें. तांणी एक महत्वाचें विधेयक मांडपाक आडखळ हाडली. गोंय विधानसभा मतदारसंघांत अनुसुचीत जमातींच्या प्रतिनिधीत्वाची फेररचणूक विधेयक, 2024 गोंयच्या आदिवासी समाजाक योग्य प्रतिनिधित्व मेळचें हे खातीर गरजेचें आशिल्लें. हें विधेयक विरोधी खासदारांच्या विघटनकारी कृतीक लागून दुर्लक्षीत जालां. गोंयचे खासदार कॅ. विरियातो फर्नांडीस आनी काँग्रेस पक्षान एसटी समाजाच्या हिताचें रक्षण करूंक ना. लोकसभेंत काँग्रेस आनी आघाडीचें खरें रूप उक्तडार आयलें अशी टिका गोंय एसटी फुडारी अँथनी बार्बोसा हांणी केल्या
अँथनीबाब, समजात ते वटेन हे बील लोकसभेंत पास जाल्लें आनी हे वटेन देश रसातळाक गेल्लो जाल्यार तें विधेयक पास जाल्लें कितें, ना जाल्ले कितें, ताचो फायदो कितें जातलो आशिल्लो? फरक कितें पडटलो आशिल्लो? बील आज पास जालेंना जाल्यार फाल्यां वा परां जातलें. पूण एके फावट रसातळाक पाविल्लो देश परत वयर सरपाक तिनशें तरी वर्सा लागतलीं. सद्याक जे तरेन देश चलता तें पळोवन तुमी सद्या तरी स्वता पुरतो विचार करूं नाकात. पुराय देशाची परिस्थिती लक्षांत घेयात.
भाजपा संविधान मानिना. मनुस्मृती मानता. म्हणल्यार चलयांनी शिकप ना. बायलांनी घराचो हुमरो हुपपाचो ना, फक्त सान्न मारपाचें, आयदना घांसपाचे, रांदपाचें आनी भुरग्यांक जल्माक घालपाचें, भोवजन समाजांतल्या लोकांनी स्वताक उच्चवर्गीय समजतल्या लोकांची सेवा करपाची. तुमकां हें मान्य आसा? म्हजे पुरतो विचार केलो जाल्यार म्हज्या मनांत हें पक्कें दसलां की भोवजन समाजांतले भुरगे, एससी आनी एसटी समाजांतले भुरगे हे कितलेय बुद्धिवान आसूं, ते जर भाजपाचे माचयेर घुटमळटात, तर ते निश्चीत पणान ‘नासमज’ आसात.
फाटी गोंयच्या एका देवस्थानात एका उत्सवा वेळार इतली खेटाखेट जाली की कांय लोक मेले. ताचे पयती, उत्तर प्रदेशांत कुंभमेळ्या वेळार. थंयूय अशीच चिरडाचिरडी जावन लोक मेले. जगन्नाथ पुरीकूय अशेंच जालें. ह्या मरणाक जापसालदार कोण? अर्थात सगले केंद्रीय आनी राज्य मंत्री. देव म्हणटात तो खंय आसा हे कोणाकूच खबर ना. पूण श्रद्धावान जनता उमकशिकेन वता, धांवता आनी स्वताक मारून उडयता. कावड व्हरप्यां विशीं खूब वादग्रस्त बातम्यो येतात, तरी उत्तर प्रदेशाचे मुख्यमंत्री तांकां ‘बाबडे’ म्हणटात. अशें प्रोत्साहन मेळटकूच कितें जातलें?
थोडे दीस पयलीं भारत आनी पाकिस्ताना मजगतीं एक लहानशे झूज जालें. भारत जिखता अशें दिसतालें, भारत पिओके परतून मेळयता अशेंय जाणवतालें. पूण अचकीत झूज थांबलें. कोणें थांबयलें? अमेरिकेचे राष्ट्राध्यक्ष ट्रंप हांणी. अशें ट्रंपानूच 25 वेळा तरी झरयलां. आमच्या एकाय फुडाऱ्यान ताचें खंडण करूंक ना, अशे कित्याक अँथनीबाब? हो प्रश्न लोकसभेंत हाडप, ताचेर चर्चा करप ही विरोधी पक्षांची लागणूक न्हय?
ह्या झुजांत पांच लडावू विमानां मोडल्यांत, अशेंय ट्रंपानन म्हणलां. कोणाची कितलीं हाचेर ताणें कांयच भाश्य करूंक ना. म्हणचे आमचीय एक वा दोन विमानां मोडल्यात आसुये. सरकार हाचेर कांयच उलोवंक तयार ना. अशें कित्याक अँथनीबाब? हो प्रस्न संसदेंत हाडून ताची म्हायती मेळोवप हें विरोधी पक्षांचें कर्तव्य न्हय ?
पाकिस्तानांतल्यान आतंकवादी येतात आनी आमच्या लोकांक दोळ्यां मुखार मारतात आनी पिकनीक करपाक आयिल्ले वरी भारताक कूय कूय करत नाच्च जातात. सरकार जनतेक कितेंच सांगपाक तयार ना. तुमी ताचे विशीं विचारलां? आनी हो प्रश्न विरोधक हाडटा म्हूण टिका करतात?
भाजपा सरकार ज्या दिसाच्यान केंद्रांत झुटयेर आयलें त्या दिसाच्यान दरेक वेंचणुकेंत ते सत्ता हातासता. पयलीं पयलीं विरोधी पक्षाचे सरकार ते मोडून उडयताले आनी आपलें सरकार झुटयेर हाडटालें. ते पासत तांकां इडी, इन्कम टॅक्स डिपार्टमेंट बी हात सोडून पालव दितालें. उपरांत तांणी मांडणी बदल्ली. हालींच जाल्ले हरयाणा, महाराष्ट्र, दिल्लीचे वेंचणुकेंत, वेंचणूक आयुक्ताच्या सहाय्यान आपलीं मतां भरपूर प्रमाणात वाडयलीं. नवे- नवे मतदार मतदार यादींत घुसडायले आनी क्या तिनूय कडेन सत्ता हातासली. आतां बिहाराची वेंचणूक लागीं आसा. ही मांडणी आतां परतून बिहारचे वेंचणुकेंत वापरूक मेळपा ना, मतदार यादीत नवे- नवे मतदार घुसडावन कांयच उपेग जावपा ना हाचो अंदमास आयिल्यान तांणी आतां एक नवीच शक्कल सोदून काडल्या. ती म्हणचे मतदार यादींतली विरोधी पक्षांच्या मतदारांचीं नांवांच मुळा सकट काडून उडोवप. भाजपा प्रामाणीकपणान आपली धोरणां मुखार कित्याक करना? ह्यो सगल्यो कायलोळ्यो करता ताचेर चर्चा जावपाक नाका?
आनीक खूब प्रकरणां आसात. चीनान आमचो अरुणाचल प्रदेशांतलो काय वाठार बळकायला ते सुवातेर बिल्डिंगो बांदल्यात. तो आता ब्रह्मपुत्रेचेर धरण बांदता. सरकार हाचेर कांयच उलयना. मणिपूर जळटा. बायलांचेर बळजबरी जाता. एससी, एसटी बायलांक ते विवस्त्र करतात, तांची धींड काडटात, एससी, एसटी दादल्यांचेर ते मुततात. असल्या प्रकरणांचेर चर्चा करपाक कोण तयार जायनात. फकत तोंडांनी म्हणटात की आमी खंयच्याय विशयाचेर चर्चा करूंक तयार आसात. पूर्ण चर्चेचो दीस थारायनात आनी देखनूच विरोधी पक्ष लोकसभेत जें कितें करतात ते योग्यच आसा अशें म्हजें ठाम मत. तुमचें जें कितें बील आसा तें सगलें सारकें चल्ल्यार मुखार केन्नाय हाडपाक जाता अँथनीबाब.

अरविंद काकोडकार
चिखले