भांगरभूंय | प्रतिनिधी
फुटबॉल न्हय परंपरा बदलूंक लावपी स्त्रीशक्ती
अस्तुरेंच्या फुटबॉल क्लबाची काणी म्हणून नामना मेळयल्लो ‘अँड्रो ड्रिम्स’ हो लघुपट परंपरा बदलूंक शिकोवपी स्त्रीशक्तीचें कथानक सांगपी. मणिपूर राज्य तंट्याखातीर देश विदेशांत पावता, तेन्नाच फुटबॉला खातीर हें राज्य शक्ती जावन आसा, मणिपूरांत स्त्रीशक्ती फुटबॉलांत जैतवंत जातना तिका फाटीं ओडपा खातीर जे यत्न जातात ते मोडून उडोवपाक एक अस्तुरी शांतपणान कसो वावर करता, तें ह्या फिल्मांतल्यान मांडलां.
कांय फिल्म महोत्सवांनी जैत जोडून इफ्फींतल्या भारतीय पॅनोरमांत उक्तावणाक दाखयल्लो हो सिनेमा वरभर लांबायेचो आसा. स्त्रीशक्तीक म्हत्व दिवपी ह्या सिनेमाची निर्मणी करपी डॉ. मिना लाजाम सिनेमाच्या कलाकार, तंत्रज्ञां सयत उक्तावण सुवाळ्याक हजीर आशिल्ल्यो.
ऑल विमन फुटबाल क्लबाची कथा लायबी हे अस्तुरे कडल्यान सांगूंक लायल्या. मणिपूरांत अस्तुरेक लग्न जातकच फुटबॉल खेळपाक न दिवपाची, नेण्टेपणांत लग्नाची परंपरा आसा. ते पंरपरेंत बदल हाडपाक उमेद दिवपी लायबी ही अस्तुरी ‘अँड्रो ड्रिम्स’ ह्या सिनेमांतल्यान दिसता.
डॉ. मिना ह्यो मास कम्युनिकेशनच्यो प्राध्यापक. मास कम्युनिकेशनाचो उपेग बदल, जागृताय, सुदारपा पासत जावं येता. सरकारी आदारान पयसो कमी वापरून केल्लो हो सिनेमा म्हणल्यार मणिपूरांत बदल हाडपी लायबी गांवांतलो बायलां फुटबॉल जितो दवरपा पासत कशी वावुरता तें हो सिनेमा सांगता. मणिपूरचे जिणेची झलक ह्या सिनेमातल्यान दिसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
