भांगरभूंय | प्रतिनिधी
इंडीयन प्रिमीयर लिगेचे (आयपीएल) 65वे मॅचींत सनरायझर्स हैदराबादान मुंबय इंडियन्साक तीन धांवड्यांनी हारयलो. 194 धांवड्यांचो फाटलाव करपी मुंबय इंडियन्साक 20 ओव्हरींनी 7 विकेटी वगडावन 190 धांवड्यो करप शक्य जाल्यो.
मुंबय इंडियन्सा वतीन मुखेली रोहीत शर्मान सगल्यांत चड 48 धांवड्यो केल्यो. सनरायझर्स हैदराबादा वतीन उमरान मलिकान तीन विकेटी घेतल्यो.
मुंबय वतीन निमाण्या ओव्हरींनी टीम डॅव्हिडान जबरदस्त बॅटींग केली. ताणें फक्त 18 बॉलांनी 46 धांवड्यो केल्यो. ताणें तीन चवके आनी स सके मारले. मॅच मुंबय जिखतलो अशें दिशिल्लें. पूण, दोन धांवड्यो घेवपाच्या यत्नांत धांवबाद जालो.
ते पयलीं टॉस हारल्या उपरांत बॅटींग करपी सनरायझर्स हैदराबादाची सुरवात बरी जाली ना. पूण, युवा प्रियम गर्गान पंगडाचो डाव सांबाळ्ळो. प्रियमान 26 बॉलांनी 42 आनी राहुल त्रिपाठान 44 बॉलांनी 76 धांवड्यो करून पंगडाक व्हड स्कोर उबारून दिवपाक मजत केली.
उपरांत निकोलस पुरनान जलद रितीन धांवड्यो करतना 22 बॉलांनी 38 धांवड्यो केल्यो. जे तरेन तिगांयनी बॅटींग केली अशें दिसपाक लागिल्लें की सनरायझर्स हैदराबाद 200 वयर स्कोर उबारतलो म्हणून. पूण, मुंबय इंडियन्साच्या बॉलरांनी खास करून रमणदीप सिंगान मुंबयक मॅचींत हाडलो. रमणदीप सिंगान 20 ओव्हरींनी 3 विकेटी घेतल्यो.
डॅनिएल सॅम्स, रिले मेरेडिथ आनी जसप्रीत बुमरा हाणें दरेकी एक विकेट घेतली.
मुंबय इंडियन्सान आपल्या पंगडांत दोन बदल केले. ऋतीक शौकीन आनी कुमार कार्तिकेय हांचे सुवातेर मयंक मार्कंडे आनी संजय यादव हांकां निमाण्या इकरांत सुवात दिली.
सनरायझर्स हैदराबादान लेगीत आपल्या पंगडांत दोन बदल केले. प्रियम गर्गाक शशांक सिंगाचे आनी मार्को यानसनाचे सुवातेर फझल हक फारुकी हांकां खेळयले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
