भांगरभूंय | प्रतिनिधी
भारतान 25 जून 1983 दिसा संवसारीक वेस्ट इंडिजाक हारोवन प्रुडेन्शियल क्रिकेट करंड जिखलो आनी तेन्नाच्यान खऱ्या अर्थान आमच्या देशांत क्रिकेटीचें वारें व्हांवपाक लागलें. 1980, 90 च्या दशकांत भारतान साबार संवसारीक सर्ती जिखल्यो. आजूनय आघाडेच्या पंगडां मदीं आमकां जागो मेळटाच. अर्थांत आदले आनी हालींचे क्रिकेटींत जमीन- अस्मानाचो फरक आसा. तातूंत हालींच्या कांय वर्सांनी टी- 20 क्रिकेटीक खूबच म्हत्व आयलां. टेस्ट मॅच फाटीं पडल्या. फुडल्या कांय वर्सांनी ती बंदूच जातली, अशें दिसता. क्रिकेटींत पयसो भरपूर आयला. हेंय एक कारण, चडांत चड लोक ह्या विदेशी खेळा कडेन आकर्शित जावपाचें. भारताच्या राष्ट्रीय पंगडांत खेळपाची संद सगल्यांकूच मेळटा अशें ना, पूण राज्य, देश पांवड्याचेर खेळूनय बरीच जोड करूं येता. तातूंत फाटल्या कांय वर्सां सावन इंडियन प्रीमियर लीग म्हणल्यार आयपीएल सर्तींत पयशांचो घसघसोच व्हांवपाक लागला. ताका लागून बीसीसीआय (क्रिकेट मंडळ) ही देशांतलीच न्हय, तर संवसारांतली सगल्यांक गिरेस्त खेळां संघटना थारल्या.
आयपीएलाच्या फुडल्या पांच हंगामा खातीर (2023 ते 2027) मिडियाचे हक्क दिवपाक तीन दीस पावणी चल्ली. तातूंत अखेरेक हे हक्क 48 हजार 390 कोटी रुपयांक विकले. डिस्ने स्टार, अंबानी हांचे मालकीचे व्हायकाॅम 18 आनी टायम्स इंटरनॅशनल ह्या तीन कंपनींनी ते विकत घेतल्यात. फाटले खेप टिव्ही आनी डिजीटल दोनूय हक्क स्टाराक मेळिल्ले. हे खेपे हे हक्क अडेज पट ड आसात, हे विशेश. मॅची जितल्यो चड तितलो ह्या कंपनींक (आनी बीसीसीआयकूय) जादा फायदो. अर्थीक उलाढाल चड जावची, हे खातीर मंडळान मॅचींचो आंकडोय वाडोवपाचो थारायला. ह्या पांच वर्सांत 410 + मॅची जातल्यो. 2023-24 वर्सा 74-74 मॅची जातल्यो. फुडल्या दोन वर्सांनी हो आंकडो 84-84 तर पांचव्या 2027 व्या वर्सा 94 मॅची आयोजित करपाचें थारलां. अर्थांत हातूंत बदल जावपाक शकतात. क्रिकेट रसिकांक मेजवानीच मेळटली, मात सुरवातीच्या काळांत आयपीएलाची जशी क्रेझ आशिल्ली, तशी आतां दिसना.
आयपीएल सर्त ही भांगराचीं तांतयां दिवपी कोंबी हें सिद्ध जातकच आॅस्ट्रेलिया, पाकिस्तान, वेस्ट इंडिजाकूय हेच धर्तेर सर्ती जाल्यो. पूण, आयपीएलाची लोकप्रीयताय कोणाकूच मेळूंक ना. आमची लोकसंख्या चड आशिल्ल्यान हांगा प्रेक्षकूय चड आनी येणावळूय. आयपीएल सुरू केली उद्देजक ललीत मोदी हांणी. पयले अध्यक्ष तेच आशिल्ले. मात गैरवेव्हार केल्ल्याच्या आरोपा वयल्यान तांकां पदा वयल्यान काडले. उपरांत ते देशांतल्यान फरारी जाले. आयज केंद्रीय गृहमंत्री अमित शहा हांचे पुत जय बीसीसीआयचे सचीव आसात. बीसीसीआयन हालींच निवृत्त खेळगड्यांक मेळपी पेन्शन, सध्याच्या खेळगड्यांचें मानधन हातूंत नदरेत भर सारकी वाड केल्या. तातूंत चूक कांय ना. मात, येणावळींतलो कांय पयसो हेर खेळांचे उदरगती खातीर वापरल्यार बरो. मानधन, पेन्शन घेवपी भोवतेक खेळगडे हे लक्षाधीश. तातूंतले कांय जाण तर अजून लाखांनी जोडटात. मात मैदानी खेळ खेळपी खेळगडी अर्थिक नदरेन गरीब आसात. आंतरराष्ट्रीय पदकां जिखपी खेळगड्यांक पसून संवसार चलयतना घाम गळोवचो पडटा. स्वकश्टान वयर सरतना तांकां सुरवातीच्या दिसांनी कितें भोगचें पडलें, हें तांच्यो काणयो वाचल्यार होलमता. देशाचें नांव वयर काडपाक 50-60 किलोमिटर प्रवास करून प्रशिक्षण घेवपी खेळगडे आसात, घरादारा पसून स-स म्हयने पयस रावपी आसात. लाखांनी रुपयांचीं इनामां जाहीर जातात, पूण ती खेळगड्यांक मेळटाच अशें ना. आडवाद आसत.
कांय राज्यांचीं खेळां खातीं सक्रीय आसात. थंयचे खेळगडे भाग्यवान. तांकां आंतरराष्ट्रीय पांवड्याच्यो सुविधा मेळटात. खेळा मळा वयली कुबेर संघटना आशिल्ले बीसीसीआयन निदान नव्या खेळगड्यांचे जिद्दीक अर्थिक धिगी लायत जाल्यार ते देशाक आॅलिंपिकांत चड पदकां हाडून दितले. बीसीसीआय कांयच मजत करीना अशें कोण म्हणचोना. पूण नवे खेळगडे (क्रिकेटूच न्हय, तर सगल्या खेळांचे) तयार करपांत हे देशाचे सर्वोच्च संघटनेन प्राधान्य दिवंक जाय. हें सहज शक्य आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
