भांगरभूंय | प्रतिनिधी
कुमठा, खबरां संस्था : कर्नाटकांतल्या ह्या उत्तर कन्नड जिल्ह्यांत एके रेस्क्यू टिमीन एक नाग (स्पेक्टॅक्ल्ड कोब्रा) वाटयलो. त्या सोरपान चुकून रांदचे कुडींतलो सुरो गिळिल्लो. घरांत जेवण सोदतना सोरपान सुरो गिळ्ळो.
ही घडणूक कुमटा म्हालांतल्या सुमार ४ किमी अंतराचेर आशिल्ल्या हेगडे गांवांतल्या गोविंद नायक हांच्या घरांत घडली. रांदचे कुडींत सुरो जमनीचेर पडिल्लो आनी सोरपान तो जेवण म्हणून पुराय गिळ्ळो.
त्या सुर्याची लांबाय सुमार १२ इंच आनी रुंदाय २ इंच इतली आशिल्ली. शरिरांत आडकल्ल्या सुर्याक लागून नागाक हालचाल करपाक त्रास जाता हें गोविंद नायक हांच्या लक्षांत आयलें. तांणी रोखडोच सरोप इश्ट पवन हाका संपर्क केलो. पवना वांगडा जनावरां वैजकी सहाय्यक अद्वैत भट हेय घडणुके सुवातेर पावले.
पवन आनी अद्वैत ह्या दोगांयनी नागाक धरलो आनी ताका वाटावपाचें काम सुरू केलें. तांणी पयलीं नागाक धरलो आनी पोतयेंत दवरलो. उपरांत नागाच्या शरिरांत आशिल्लो सुरो काडपाक सुरवात केली. ही प्रक्रिया त्या दोगांयनी काळजी घेवन पुराय केली.
हे प्रक्रियेंत एकल्यान नागाक घट्ट धरलो आनी ताचें तोंड उगडलें. जाल्यार दुसर्यान जतनाय घेत नागाच्या शरिरांतल्यान सुरो भायर काडलो. तो ताच्या गळ्याक आडकल्लो.
तो सुरो रक्तान माखिल्लो. मात सुरो भायर येतांच नाग परत बरे भशेन हालचाल करपाक लागलो. टिमीन उपरांत नागाक गरजेचे उपचार दिले. नागाची अवस्था बरी आशिल्ल्याची खात्री जाले उपरांत ताका परत रानांत सोडलो. नागाच्या शरिरांतल्यान सुरो भायर काडपाचे व्हिडियो सध्या व्हायरल जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
