हिंदी- कोंकणी : भाशाशास्त्र आनी व्याकरणांतलीं आव्हानां

भांगरभूंय | प्रतिनिधी

6- 7 मार्चाक गोंय विद्यापिठांत राष्ट्रीय परिसंवाद

भांगरभूंय । खबरां मेज
पणजी : हिंदी-कोंकणी : भाशाशास्त्र आनी व्याकरणांतलीं आव्हानां, ह्या विशयाचेर दोन दिसांचो राष्ट्रीय परिसंवाद गोंय विद्यापिठाच्या शणै गोंयबाब भास आनी साहित्य संकाय आनी कला आनी संस्कृती मंत्रालयाच्या संयुक्तपणान 6-7 मार्चाक आयोजीत केला. गोंय राज्याचे मानादीक कला आनी संस्कृती मंत्री गोविंद गावडे हे परिसंवादाचे उद्घाटक आनी मुखेल सोयरे म्हूण हाजीर आसतले. वरिश्ठ भाशाशास्त्रज्ञ प्रा. वी. रा. जगन्नाथन हे बीजभाशक म्हणून आसतले जाल्यार वरिश्ठ भाशाशास्त्रज्ञ प्रा. उमाशंकर उपाध्याय हे मानाचे सोयरे म्हणून हाजीर आसतले. ह्या परिसंवादांत भारतांतल्या वेगवेगळ्या राज्यांतले भाशाशास्त्रज्ञ आनी व्याकरण तज्ञ येतले जातूंत डॉ. योगेंद्रनाथ मिश्र, प्रा. धनजी प्रसाद, डॉ. अविचल गौतम, डॉ. ऋषिकेश मिश्र, मुइनुल हसन नियाजी, प्रकाश निर्मळ हांचो आस्पाव आसा जाल्यार गोंयांतले तज्ञ दामोदर घाणेकार, डॉ. भूषण भावे, प्रा. अनुराधा वागळे, डॉ. प्रकाश पर्येंकार, डॉ. संदीप लोटलीकार, डॉ. प्रदीप जटाळ, रजत हेगडे हे हाजीर आसतले. संगणक आनी आधुनीक भाशाशास्त्र, हिंदीचें मानक शुद्धलेखन, भाशाशास्त्र आनी व्याकरणाचें स्वरूप, कोंकणी भाशाशास्त्राचें रूप आनी अणकार, हिंदी आनी कोंकणी हांचें बदलतें स्वरूप अशीं तरेकवार सत्रां ह्या परिसंवादांत आसात. पुरायपणान भाशाशास्त्र आनी व्याकरणाचेर भर दिवपी हो पयलो आगळो-वेगळो परिसंवाद आसूं येता. ह्या परिसंवादाचे आयोजक आदित्य सिनाय भांगी आनी सह-संयोजक दीपक वरक हे आसात. ह्या परिसंवादाक सगळ्यांनी हाजीर रावचें आनी ताचो लाव घेवचो असो उलो उप-अधिष्ठाती प्रा. वृषाली मांद्रेकार हांणी मारलां.