भांगरभूंय | प्रतिनिधी
राष्ट्रकूल खेळां सर्तींतले पयले बायलांचे टी-20 मॅचींत ऑस्ट्रेलियेन भारताक 3 विकेटींनी हारयलो.
भारतान ऑस्ट्रेलियेक जैता खातीर 155 धांवड्यांची मोख दवरिल्ली. ताणें ही मोख 7 विकेटी वगडावन 19वे मॅचींत मेळयली. ऑस्ट्रेलिये वतीन अॅश्ली गार्डनरान नाबाद 52 धांवड्यांची खेळी करीत आपल्या पंगडाक जैत मेळोवन दिलें. तिका ग्रेस हॅरिसान बरी साथ दिली. तिणें 20 बॉलांनी 37 धांवड्यो केल्यो. भारता वतीन रेणुका सिंगान 4 जाल्यार दिप्ती शर्मान 2 विकेटी घेतल्यो.
155 धांवड्यांचो फाटलाव करतना ऑस्ट्रेलियेन एका वेळार 49 धांवड्यांचेर 5 विकेटी वगडायिल्ल्यो. पयल्यो चार विकेटी रेणुका सिंग हिणें घेतिल्ल्यो. पूण, उपरांत अॅश्ली गार्डनर, ग्रेस हॅरिस आनी एलाना किंग हांणी जबरदस्त बॅटींग करून ऑस्ट्रेलियेक जैत मेळोवन दिलें.
ते पयलीं चवथे सुवातेर बॅटींग करपाक देंविल्ली मुखेली हरमनप्रीत कौर हिणें 34 बॉलांनी 52 धांवड्यो केल्यो. हातूंत आठ चवक्यांचो आनी एका सक्याचो आस्पाव आशिल्लो. ती 20वे ओव्हरीच्या पांचव्या बॉलाचेर बाद जाली. शेफाली वर्मान 33 बॉलांनी 48 धांवड्यो केल्यो. तिणें णव चवके मारले.
दोनूय पंगडां मदीं आतां मेरेन 24 मॅची जाल्यात. हातूंतल्यो फक्त स मॅची भारताक जिखप शक्य जालां. ऑस्ट्रेलिया 17 मॅची जिखला, जाल्यार एके मॅचीचो निकाल लागूंक ना.
पेंवपी नटराज सेमींत
भारताचो युवा स्टार पेंवपी श्रीहरी नटराजान 100 मिटर बॅकस्ट्रोक सर्तीचे सेमी फायनलींत सुवात मेळयली. नटराजान हीट चारांत वांटो घेतना 54.68 सेकंद घेवन तिसरी सुवात मेळयली.
मजगतीं, दादल्यांच्या 400 मिटर फ्री स्टायल हीट तिनांत कुशाग्र रावताक आपलो ठसो उमठोवपाक जमूंक ना. ताणें 3.57.45 वेळ घेवन आठवी सुवात मेळयली.
बॉक्सर शिव थापा प्री क्वॉर्टरफायनलींत
भारताचो अणभवी बॉक्सर शिवा थापान राष्ट्रकूल खेळां सर्तीक बरी सुरवात करतना 63.5 कील गटाचे प्री क्वॉर्टरफायनलींत सुवात मेळयली. ताणें पाकिस्तानाच्या सुलेमान बलोचाक 5-0 फरकान हारयलो. पुर्ण मॅचींत थापान आपलो शेक दवरलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
