हरमला विकसीत भारत संकल्प यात्रेक येवकार

भांगरभूंय | प्रतिनिधी

हरमल: पंचायतीच्यो उपसरपंच अनुपमा प्रमोद मयेंकार हांणी विकसीत भारत संकल्प यात्रेक कार्मेल मैदानार येवकार दिलो. ह्या वेळार पंच वांगडी सोनाली मज्जी, सांतान फर्नांडीस, सुशांत गावडे, दिव्या गडेकार, भिकाजी नायक, पंचायत खात्याच्यो अभियंत्यो सोनाक्षी नागेशकार, पंचायत सचीव सचीन धावस्कार हाजीर आशिल्ले.

हे कार्यावळीक हरमलचे खेळगडे पर्ल पिटर फर्नांडीस (16 वर्सां पिराये सकयल्या गोंय फुटबॉल पंगडांतल्यान प्रतिनिधित्व) आनी कु. नॅथन सिल्वेस्टर रॉड्रिग्ज (मुंबय सिटी फुटबॉल क्लबा खातीर निवड आनी खेळगडो म्हूण पदार्पण) हांकां भोवमानीत केले.

धावी परिक्षेंत हरमल पंचक्रोशींत पयलो नीरज नीलेश कुडव आनी पूर्वा दिलीप नायक (93 टक्के) आनी कार्मेल स्कुलाची तन्वी ठाकूर (90 टक्के), रायन रॉड्रिग्ज 87 (टक्के) हांकां शाल आनी श्रीफळ आनी यादस्तीक भेटोवन भोवमान केलो. हरमल गांवांतले मुर्तीकार नंदकुमार हळदणकार, विनायक नायक आनी दयानंद वस्त हांचो शाल, श्रीफळ आनी यादस्तीक भेटोवन भोवमान केलो.

ह्या वेळार तुयें भलायकी केंद्रा वतीन ‘स्वस्थ बालक, बालिका’ सर्तींत पयलो कु. महंत नायक, दुसरो कु. गणेश शेटकार आनी तिसरें कु. डिलेन फर्नांडीस तशेंच कु. अयोग आरोलकार, दक्ष हरमलकार, इनोस लक्दा, घनिस्था ठाकूर, सुरज हरिजन, श्राविया कांदोळकार हांकां खाशेलीं इनामां भेटयलीं.

ह्या वेळार श्रीरवळनाथ भुमिका बायलां पंगडान फुगडी सादर केली. तातूंत समिक्षा नायक, रंजिता कुडव, प्रशिला ठाकूर, वैशाली ठाकूर, साक्षी नायक, सुधा नायक आनी गायत्री विर्नोडकार हांकां यादस्तीक आनी प्रशस्तीपत्रक दिवन भोवमानीत केले.

पंचायत खात्याच्यो अभियंत्यो सोनाक्षी नागेशकार हांणी प्रधानमंत्री नरेंद्र मोदी हांचो संदेश आशिल्ली विकसीत भारत संकल्प यात्रेची तसबीर पंचायत उपसरपंच अनुपमा मयेंकार हांचे कडेन सुपूर्द केली. ह्या वेळार हाजीर आशिल्ल्यांक देशाचो समृद्ध वारसो आनी विकासा कडेन कर्तव्यपुर्तीचो सोपूत दिलो.

ह्या वेळार भारत गॅसच्या अधिकाऱ्यांनी ई केवायसी विशीं म्हायती दिली. भलायकी अधिकारी डॉ. स्वरा आमोणकार हांणी आभा आयडी, भलायकी विमो आनी हेर तरेची म्हायती दिली.

अखील भारतीय शेती अनुसंधनाचे पोरणे गोंयचे डॉ. संतोष कुमार हांणी सविस्तर म्हायती दिली. ह्या वेळार पंचायत क्लार्क तृप्ती शेटकार आनी एलिसिया फर्नांडीस हांणी मानेस्तांक फुलांतुरो भेटोवन येवकार दिलो.

सुत्रसंचालन आनी उपकार चंद्रहास दाभोलकार हांणी मानले. हे कार्यावळींत खादी ग्रामद्यो, भलायकी, गट विकास, गोरवां सांबाळ खातें, नुस्तेमार खातें आदीं खात्याचे अधिकारी हाजीर आशिल्ले.

कार्यावळ येसस्वी करपा खातीर उपसरपंच अनुपमा मयेंकार आनी पंच सोनाली माज्जी, सचीव सचीन धवस्कार हांणी खर कश्ट घेतले.

मजगतीं, भलायकी, शेती आनी गॅस एजन्सी सोडून हेर अधिकाऱ्यांनी कसलेच येवजणेची हाजीर आशिल्ल्यांक म्हायती दिली ना. आयोजकांनी खूबशे फावटी अधिकाऱ्यांक म्हायती दिवपाची विनंती केल्ली. ते खातीर नागरिकांनी निरशेवणी उक्तायली.