भांगरभूंय | प्रतिनिधी
नुस्तें उत्पादनांत विक्रमी वाड जावपाची शक्यताय
पणजी, प्रतिनिधी ः नुस्ते म्हळ्यार गोंयकारांचें आवडीचें खाण. नुस्तें ना जाल्यार जेवणाक रुच ना म्हणपाक हरकत ना. गोंयात ताल्ले, बांगडे, इसवण, पापलेट, सुंगट आदि तरेचे सगलें नुस्तें मेळटा.
फाटल्या वर्सा प्रमाण, राज्यांत बांगडे, ताल्ल्यां सयत नुस्त्याच्या उत्पादनांत विक्रमी वाड जावपाची शक्यताय आसा. फाटल्या वर्सा राज्यांत दर्यांत आनी गोड्या उदकांतल्यान 1,28,659 टन नुस्तें मेळ्ळें. हो आंकडो चार वर्सांच्या तुळेंत सगळ्यांत चड आशिल्लो. अंदूं जानेवारी ते जून ह्या स म्हयन्यांत 68,831 टन नुस्तें मेळ्ळां. देखून ह्या वर्साचें उत्पादन फाटल्या पांच वर्सांचो विक्रम मोडपाची शक्यताय आसा.
राज्यांत नुस्त्याचें उत्पादन वाडोवपा खातीर राज्य सरकार वेगवेगळे मार्ग आपणायता. नुस्ते धरपी खातीर वेगवेगळीं येवजण्यो चालीक लावपाक लागल्यात. केंद्र सरकाराच्यो येवजण्यो नुस्ते धरपी मेरेन पावोवपाची मोहीम चालू आसा. फाटल्या वर्सा आनी ह्या वर्सा नुस्त्याचें उत्पादन वाडिल्ल्यान ताचो फायदो जाता हे स्पश्ट दिसता.
फाटल्या वर्सा दर्यांतल्यान 1,22,224 टन आनी गोड्या उदकांतल्यान 6,435 टन नुस्तें मेळ्ळां. अंदूं पयल्या स म्हयन्यांत दर्यांतल्यान 66,414 टन आनी गोड्या उदकांतल्यान 2,417 टन मेळून वट्ट 68,831 टन नुस्तें धरलां. नुस्तेमारी खात्यान दिल्ल्या आंकड्यां प्रमाण ह्या वर्साय फाटल्या वर्सा प्रमाण बांगडे, ताल्ले, सुंगट आदी नुस्त्यांत वाड जाल्या.
मजगतीं, 2019 आनी 2020 वर्सा कोविड काळांत वेगवेगळ्या निर्बंधांक लागून राज्यांत नुस्त्याचें उत्पादन सामकें उणें जाल्लें. पूण, निर्बंध काडल्या उपरांत फुडल्या दोन वर्सांत तातूंत खूब वाड जाली.
बेकायदेशीर नुस्तेंमारींत उणाव
नुस्तेमारी बंदीच्या काळांत गोंयच्या अधिकारक्षेत्राखाला दर्यांत नुस्तें धरपी कर्नाटक, महाराष्ट्र ट्रॉलरांक आडावपा खातीर नुस्तेमारी खात्यान वेगवेगळे उपाय येवजण्यो आंखल्यात. तशेंच कोस्ट गार्डाचे कर्मचारीय परिस्थितीचेर नदर दवरून नेमान गस्त घालतात. ताचो फायदो राज्यांत नुस्त्याचें उत्पादन वाडोवपा खातीर जाता अशी म्हायती नुस्तेमारी खात्याच्या अधिकाऱ्यांनी दिली.
अंदूंय निर्गतींत वाड जातली
फाटल्या वर्सा राज्यांत धरिल्ल्या 63,333 टन नुस्त्याची निर्गत हेर देशांनी जाली. तातूंतल्यान राज्याक सुमार 730 कोटी येणावळ मेळ्ळी. अंदूंच्या उत्पादना खातीर नुस्त्यांचे निर्गतींत वाड जावन खात्याक चड येणावळ मेळटली अशी अपेक्षा आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
