भांगरभूंय | प्रतिनिधी
अमित परब ः ज्ञानप्रसारक मंडळाच्या काॅलेज अॅण्ड रिसर्च सेंटरांत मनयलो स्वातंत्र्य दीस
पणजी ः भक्तीभावान काम करप आनी आपल्या क्षेत्रांत उत्कृश्ठ वावर करून नांव जोडप ही लेगीत एक देशभक्तीच. अशो व्यक्ती लश्कर आनी नौदळा सारकीच देशाचीय सेवा करतात अशें भारतीय लश्कराचे कर्नल अमित परब हांणी सांगलें.
आसगांवच्या ज्ञानप्रसारक मंडळाच्या काॅलेज अॅण्ड रिसर्च सेंटरांत घडोवन हाडिल्ल्या 75 व्या स्वातंत्र्य दिसा निमतानच्या सुवाळ्यांत ते मुखेल सोयरे ह्या नात्यान उलयताले. तांणी तिरंगो हुबयलो आनी काॅलेजीचे प्राचार्य डी. बी. आरोलकार हांचे सयत एनसीसी आर्मी आनी एनसीसी नेव्ही विभागाच्या संचालनाचें निरिक्षण केलें.
लागीं लागीं 23 वर्सां उपरांत हांव महाविद्यालयाक भेट दितां. ही म्हजे खातीर खोशेची आनी आनंदाची गजाल. हे भेटेक लागून कितल्योश्योच यादी जाग्यो जाल्यो अशें ह्या महाविद्यालयाचे आदले विद्यार्थी आशिल्ले कर्नल अमित परब हांणी सांगलें.
कठीण काळांत संघभावना म्हत्वाची आसता. कोणेंय कसलोय सल्लो दिवं, ताचेर आडनदर करूं नाकात. केन्ना केन्नाय तो सल्लोच तुमचो फुडार घडयता अशेंय तांणी सांगलें.
मिसेस इंडिया 2022 ची जैतिवंत जॅकलीन शिंदे, द क्वीन आॅफ सबस्टन्स हीं ह्या वेळार मानाचीं सोयरीं आसलीं. तांणी आपल्या उलोवपांत विद्यार्थ्यांक महाविद्यालयीन उपक्रमांनी भोव करून एनसीसींत वांटो घेवपाचें आवाहन केलें.
डीएम महाविद्यालयांत पदवी घेतकच म्हाका कितल्याश्याच बऱ्या-वायट गजालींक तोंड दिवचें पडलें पूण महाविद्यालयाच्या कार्यावळींतल्यान मेळिल्लो आत्मविस्वास आनी प्रेरणा हाका लागून हांव परिक्षांनी तग धरूंक शकली अशें तांणी सांगलें.
मिेसेस इंडिया 2022 सर्तींत जैतिवंत जावपाची तांची काणी आंगार कांटो हाडपा सारकी आसली. एके चलयेक जल्म दितकच स म्हयन्यांनी हांवें मिसेस इंडिया सर्तींत प्रवेश केलो आनी वजन उणें करपा खातीर आनी वस्तादपण मेळोवपाक परत आकारांत येवपा खातीर म्हाका खर प्रशिक्षण घेवचें पडलें अशेंय तांणी सांगलें.
ह्या वेळार दोनूय व्यक्तीमत्वांचो तांच्या संबंदीत कामगिरी खातीर सत्कार केलो. भारत ही बुद्ध, गांधी आनी कृष्णाची भूंय आनी ती आमी विसरूंक फावना. आमचो शांतिकाय आनी अहिंसेचेर विस्वास आसा आनी आमची जिणेपद्दत आमकां हातूंतल्यान जाय तें साध्य करून दिता अशें मंडळाचे अध्यक्ष श्रीकृष्ण पोकळे हांणी सांगलें.
प्रा. डी. बी. आरोलकार हांणी येवकार दिलो. आपल्या येवकाराच्या उलोवपांत तांणी महाविद्यालयाच्या आदल्या विद्यार्थ्यांचें अभिनंदन केलें आनी 75 व्या स्वातंत्र्य दिसा निमतान दोन म्हान व्यक्तीमत्वांचो भोवमान जावप हो महाविद्यालया खातीर अभिमानाचो खीण म्हणपाचें सांगलें.
आमचे आदले विद्यार्थी हे महाविद्यालयाच्या आचार आनी संस्कृतीचे दूत आसात. मनशाचे जिणेंत स्वातंत्र्य ही सगल्यांत व्हडली गजाल आनी आमचो देश संवसारांतलो सगल्यांत उत्तम देश करपा खातीर आमी सगल्यांनी खर परिश्रम करूंक जाय अशेंय आरोलकार हांणी सांगलें.
महाविद्यालयाची उपप्राचार्य रश्मी आर. रेडकार हांणी उपकार मानले. अर्थशास्त्र विभागाची सहाय्यक प्रा. डेनिका मिनेझिस हांणी कार्यावळीचें सुत्रसंचालन केलें. कार्यावळीची प्रभारी इंग्लीश विभागाची मुखेल डाॅ. एम. शांती आशिल्ली.
हे कार्यावळी उपरांत विद्यार्थ्यां खातीर भेसवण सर्त आनी शिक्षक आनी शिक्षकेतर कर्मचाऱ्यां खातीर उत्कृश्ठ भेस शो आयोजीत केल्लो. स्वातंत्र्याच्या 75 व्या वर्सा निमतान एक भारत, श्रेश्ठ भारत, इतिहास विभाग आनी वाणिज्य विभाग हांच्या जोड पालवान उच्च शिक्षण संचालनालयाच्या सहकार्यान साबार सर्तींचें आयोजन केल्लें. महाविद्यालयाच्या ग्रंथालय आनी म्हायती केंद्राचे वतीन एक ग्रंथप्रदर्शनूय आयोजीत केल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
