भांगरभूंय | प्रतिनिधी
विद्यानंद पवारः भुमिका उच्च माध्यमिकांत सायबर गुन्यांवां विशीं कार्यावळ
भांगरभूंय । प्रतिनिधी
केरी- सत्तरीः सोशल मिडियाच्या गैरवापरा पासून विद्यार्थ्यांनी पयस रावचें, अशें गुन्यांव अन्वेशण विभागाचे निरिक्षक विद्यानंद पवार हांणी सांगलें.
पर्यें सत्तरीचे श्री भुमिका शिक्षण संस्थे वतीन संचालीत श्री भुमिका उच्च माघ्यमीक विद्यालयाचे राष्ट्रीय सेवा येवजणेचे जागरुकता कार्यावळी खाला ‘भारतांतले सायबर गुन्यांव, सायबर सुरक्षा आनी सायबर कायदे’ ह्या विशयाचेर म्हायतीपूर्ण आनी संवादात्मक सत्र जालें. ह्या सत्रांत पवार हांणी सत्राचे मार्गदर्शक म्हूण यत्ता 11वी आनी 12 वेच्या विद्यार्थ्यां कडेन संवाद सादलो. ह्या वेळार तांणी विवीध सायबर गुन्यांवां विशीं म्हायती दिली. लोक सायबर गुन्यांवांचे भकीक कशे पडटात हे विशीं म्हायती दिली आनी विद्यार्थ्यांक सोशल मिडियाच्या गैरवापरा पासून पयस रावपाक सांगलें.
पवार हांचे वांगडा माचयेर माध्यमिकाचे प्राचार्य यशवंत सावंत, उपप्राचार्य रावसाहेब राणे हाजीर आशिल्ले.
पवार हांणी कला फांट्याच्या विद्यार्थ्यांनी हडप्पा संस्कृती विशीं कला आनी वस्तू तशेंच ‘ब्राह्मी’ हे प्राचीन लिपयेची प्रतिकृती आशिल्ल्या प्रदर्शनाचें उक्तावण केलें. शिक्षिका ममता उर्फ सना गांवस हांणी सुत्रसंचालन केलें आनी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
