भांगरभूंय | प्रतिनिधी
फुडल्या वर्सा 21 नोव्हेंबर सावन अवशेश दर्शन सुवाळो
पणजी, प्रतिनिधी : फुडल्या वर्सा 21 नोव्हेंबर 2024 सावन सुरू जावपी सेंट फ्रान्सिस झेवियर पवित्र अवशेश दर्शन सुवाळ्याची तयारी सुरू जाल्या. मुख्यमंत्र्यांच्या अध्यक्षते खाला खासा समिती स्थापन जातली. भाविकांची सगळी तजवीज जातली, अशें मुख्यमंत्री डॉ. प्रमोद सावंत हांणी सांगलें.
गोंयच्या सायबाचे आयज फेस्त. प्रार्थना सभेक हाजेरी लायले उपरांत मुख्यमंत्र्यांनी ही म्हायती दिली. सेंट फ्रान्सिस झेवियरच्या फेस्ता खातीर पोरणे गोंय चर्च वाठारांत बरीच गर्दी जाल्या. गोंय तशेच गोंय भायल्यान हजारांच्या संख्येन भाविक आयल्यात. सकाळचे मुखेल प्रार्थना सभेक मुख्यमंत्री डॉ. सावंत हांचे सयत आमदार मायकल लोबो, आमदार राजेश फळदेसाय, पुलिस म्हासंचालक जसपाल सिंग, आमदार आलेक्स रेजिनाल्ड, आमदार विजय सरदेसाय तशेच हेर मानेस्त हाजीर आशिल्ले.
फेस्ता निमतान मुख्यमंत्र्यांनी गोंयकार आनी भाविकांक परबी भेटयली.
सेंट फ्रान्सिस झेवियर हांचे पवित्र अवशेशाचो दर्शन सुवाळो 10 वर्सां उपरांत जाता. हाचे पयली 2014 वर्सा पवित्र अवशेश दर्शन सुवाळो जाल्लो. हजारांच्या संख्येन दर दिसा भाविक पोरणे गोंय चर्चीक भेट दिता. मुळाव्या सुविधां सयत उदक तशेच पुलिस बंदोबस्ताची वेवस्था करची पडटा. 21 नोव्हेंबर 2024 ते 6 जानेवारी 2025 मेरेन अवशेश दर्शन सुवाळो जातलो. आतां पासून तयारी सुरू जाल्या. भाविक वा पर्यटकांची कसलीच गैरसोय जावची ना, अशें मुख्यमंत्री सावंत हांणी सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
