भांगरभूंय | प्रतिनिधी
सुपरनोवा पंगडान तिसरे खेपे बायलांची टी-20 चॅलेंज लीग जिखली. हांगाच्या महाराष्ट्र क्रिकेट असोसिएशनाच्या मैदानाचेर जाल्ले फायनलींत ताणें वेलोसिटी पंगडाक 4 धांवड्यांनी हारयलो.
सुपरनोवान वेलोसिटीक जैता खातीर 166 धांवड्यांची मोख दिल्ली. ताचो फाटलाव करतना वेलोसिटीक 8 विकेटी वगडावन 161 धांवड्यो करप शक्य जाल्यो.
सुपरनोवा हाचे पयलीं 2018 आनी 2019 वस्तादपण जोडिल्लें, जाल्यार वेलोसिटीक परतून एकदां वस्तादपणान हुलकावणी दिली.
ते आदीं टॉस हारल्या उपरांत पयली बॅटींग करतना सुपरनोवान निर्धारीत 20 ओव्हरींनी 7 विकेटी वगडावन 165 धांवड्यो केल्यो. डिएण्ड्रा डॉटीनान सगल्यांत चड 62 धांवड्यांची खेळी केली. वेलोसिटी वतीन सिमरन बहादूर, केट क्रॉस आनी दिप्ती शर्मा हिणें दरेकी दोन विकेटी घेतल्यो.
प्रिया पुनिया आनी डिएण्ड्रा हांणी पंगडाक उत्कृश्ठ सुरवात करून दिली. दोगांयनी पयले विकेटी खातीर 73 धांवड्यांची खेळी केली. पुनियान बाद जावचे पयलीं 2 सक्यांचे मजतीन 28 धांवड्यो केल्यो. ते उपरांत डीएण्ड्राच्या रुपान सुपरनोवाक दुसरो धपको बसलो. ताणें 44 बॉलांनी चार सके आनी एक चवक्याचे मजतीन 62 धांवड्यो केल्यो.
मुखेली हरमनप्रीत कौरान लेगीत म्हत्वाचें योगदान दिलें. तिणें 43 धांवड्यो केल्यो. ह्या तिगांक सोडलें जाल्यार एकाय बॅट्समनाक व्हड योगदान दिवपाक जमलें ना. पुजा वस्त्रकर (5), अॅक्लेस्टोन (2), सून लुस (3) आनी हार्लीन देओल (7) सवाय भितर बाद जालीं, ताका लागून सुपरनोवाक बरे सुरवाती उपरांत लेगीत दोनश्या मेरेन मजल मारपाक जमली ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
