भांगरभूंय | प्रतिनिधी
म्हापशेंः सिरसय रेल्वे पुला लागी पणजी ते वाळपय मार्गा वयल्या प्रवासी बशीचो वीज खांब्याक धपको बसून जाल्ल्या अपघातांत चालक आनी वाहका सयत 16 प्रवासी जखमी जाले. मुखा वयल्यान येवपी एके दुचाकीक वाटावपा खातीर ड्रायव्हरान नेटान ब्रेक लायलो आनी बशीचो ताबो वचून तिचो वीज खांबाक नेटाचो धपको बसलो. सुदैवान कसलीच जिवितहानी जावंक ना.
ह्या अपघातांत बस चालक राजेश गोडकार (पिर्ण), वाहक इम्रान शेख (नेरूल), दत्ताराम शिरोडकार , रतिकेश ताळगांवकार (कुडाळ), राजेश बोर्डेकार (सांखळी), सारा आंद्रेद (अस्नोडें), अश्मिता गांवकार (दिवचल), प्रणाली देविदास (शिरगांव), सुवर्णा नायक (दिवचल), सुरेखा नायक (दिवचल), संजना वरक (वाळपय), कल्पना वरक (वाळपय), अंजली प्रभू , रिमा शिंगणेंकार (वाळपय), फातिमा सय्यद (दिवचल) आनी प्रविणबानू सय्यद (दिवचल) हे प्रवासी जखमी जाल्यात.
हो अपघात शेनवारा दनपारां 3.10 वराच्या सुमाराक घडलो. जीए 03 एन 1023 ह्या क्रमांकाची खाजगी प्रवासी बस म्हापशेंच्यान वाळपय वताली.
बस सिरसय पावले उपरांत एके दुचाकी अचकींत बशीच्या मुखार अायिल्ल्यान तिका वाटावपा खातीर ड्रायव्हरान नेटान ब्रेक लायलो आनी बशीची ताबो गेल्ल्यान तिचो कुशीच्या वीज खांब्यांक धपको बसलो. नेटाच्या धपक्यान वीज खांबो मोडून
पडलो.
जखमींक म्हापशें जिल्हो हॉस्पिटलांत दाखल केल्यात. तांचे उपचार सुरू आसात. अपघाताचो पंचनामो कोलवाळ पुलीस हवालदार अजय गांवकार हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
