भांगरभूंय | प्रतिनिधी
भारताच्या क्रिकेट पंगडाचो विकेटकीपर वृद्धिमान साहाक धमकी दिवपी खेळां पत्रकार बोरिया मुजुमदाराचेर भारतीय क्रिकेट नियामक मंडळान (बीसीसीआय) दोन वर्सांची बंदी घाल्या.
बीसीसीआय आतां आंतरराष्ट्रीय क्रिकेट समितीक (आयसीसी) लेगीत मुजुमदाराचेर कारवाय करपाची विनंती करतलें.
साहान मुजुमदाराक मुलाखत दिवंक ना आनी ताचो फोन लेगीत उखलूंक ना. ते उपरांत ट्विटरा वयल्यान साहाक ताणें धमकी दिल्ली. तुजी मुलाखत केन्नाच घेवचो ना. आपलो जाल्लो अपमान केन्नाच विसरचो ना अशें मुजुमदारान म्हणिल्लें.
इतकी वर्सां भारतीय क्रिकेटी खातीर दिल्ल्या योगदाना उपरांत आपल्या एका भोवमानादीक पत्रकारा कडल्यान अशी वागणूक मेळटा. देशांतली पत्रकारिता खंयच्या पांवड्याचेर पावल्या पळयात अशें साहान म्हणिल्लें.
हाची दखल घेत बीसीसीआयन ह्या प्रकरणाची दखल घेत तीन वांगड्यांची समिती स्थापन केल्ली. हातूंत उपाध्यक्ष राजीव शुक्ला, भांडारी अरुणसिंग धुमाल, शिखर परिशदेचे वांगडी प्रभतेजसिंग भाटिया हाचो आस्पाव आशिल्लो.
मुजुमदाराक देशांतल्या खंयच्याच स्टेडियमांत प्रवेश दिवचो न्हय अशी सुचोवणी बीसीसीआयच्या अंतर्गत येवपी सगल्या राज्य क्रिकेट संघटनांक दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
