भांगरभूंय | प्रतिनिधी
दुबावीत दीसवड्या वयलो कामगार
म्हापशें: साळगांव पुलिसांनी घुंवळे वखदां आड केल्ले कारवायेंत प्रताप रतन बिस्वास (22, रा. पिळर्ण, मूळ अस्तंत बंगाल) ह्या दुबाविताक अटक केल्या. ताचे कडल्यान 1.20 लाखांचो 1.161 कील गांजो जप्त केला.
पुलिसांनी ही कारवाय काल (बिरेस्तारा) दनपारां 2.30 वरांच्या सुमाराक केली. सोनारभाट साळगांवां सेमीनरी मैदाना कुशीक घुंवळे वखदांची विक्री जावपाची आशिल्ल्याची म्हायती पुलिसांक खात्रेच्या गोपां कडल्यान मेळिल्ली. ते प्रमाण सांपळो रचलो. दुबावीत आरोपी घुंवळे वखदांचे विक्रे खातीर घडणूक थळार येतकूच पुलिसांनी ताका धरलो आनी ताची झडटी घेतकूच दुबाविता कडेन एक कील 161 ग्राम गांजो सांपडलो. ह्या गांज्याचें मोल 1 लाख 20 हजार रुपया आसा.
हो गांजो पुलिसांनी जप्त केला आनी दुबाविता आड घुंवळे वखदां प्रतिबंध कायद्या खाला गुन्यांव नोंद करून ताका अटक केल्या. पुलीस उपअधिक्षक विश्वेश कर्पे आनी निरिक्षक सचीन लोकरे हांच्या मार्गदर्शना खाला उपनिरिक्षक अतिकेश खेडेकार, कॉन्स्टेबल विशांत मयेंकार, विजय पाळणी, सचीन गावडे, सर्वेश गांवस आनी नितेश वायंगणकार फुडलो तपास करतात.
मजगतीं, दुबावीत आरोपी हो दीसवड्याचेर कामाक वचपी आसून तो पिळर्णां भाड्याचे कुडींत रावतालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
