भांगरभूंय | प्रतिनिधी
एका खबरापत्रान दोन वर्सां आदी 71% लोकां मदीं होमियोपथी वैजकी शास्त्राची पर्यायी उपचारां मदीं पयल्या क्रमांकाचे निवड जाल्या, असो सोदनिबंद छापून हाडिल्लो.
1796 वर्सा जर्मनींत होमियोपथीचो सोद डॉ. सॅम्युअल हेनेमन हांणी लायलो. ते ऑर्थोडोक्स मॅडिसीनाचो दोतोर. त्या काळांत दुयेसां खातीर लोकांक जावपी त्रासां परस उपचारा वेळार केल्ले क्रियेचो त्रास कितलेशेच पटीन चड जातालो. ते दोतोराक पळोवं नज जाल्ल्यान तांणी दोतोरकी सोडून वैजकी शास्त्राचीं पुस्तकां अणकारीत करपाक सुरूवात केली. अशेंच एक जर्मन पुस्तक अणकारीत करतना तांकां Cinchona Bark नांवाच्या वखदी रोंपान मलेरिया निवळावपाचें कांय गूण मेळ्ळे. त्याच जातीच्या हेर रोप्यांनी अशे गूण कित्याक आसनात हे जाणून घेवपाक तांणी त्या रोंपाचे कांय डोस पोटान घेवन पळयले. तेन्ना मलेरिया दुयेसाचीं लक्षणां ताच्या घटमूट आनी निरोगी आशिल्ल्या कुडींत दिसपाक लागलीं. उपरांत 6 वर्सां सातत्यान अभ्यास करून 1796 वर्सा आपल्या ‘A new principle of ascertaining the curative power of drugs’ ह्या वैजकी निबंदांत उदाहरणां सयत हो सोदनिबंद छापून हाडलो. देखून 10 एप्रिल हो तांचो जल्मदीस ‘संवसारीक होमियोपथी दीस’ म्हूण मनयतात.
Like cures like ह्या तत्वाचेर चलपी हे वैजकी शास्त्र हेर पर्यायां परस वेगळें आसा. दुयेंतीक कमीत कमी त्रास जावन मुळा सकट दुयेंस काडून कशें उडोवचें हाचो विचार होमियोपथी शास्त्रांत जाता. मनीस जेन्ना भलायकेचो विचार करता तेन्ना ताची मानसीक, शारिरीक आनी भावनीक भलायकीय तितलीच गरजेची, अशें आमी म्हणटात. पूण मनशाचेर जेन्ना उपचार जाता तेन्ना ह्या सगळ्या गजालींचो विचार जावप गरजेचें न्हय? मनशाच्या मानसिक- भावनीक त्रासांचो शरिराचेर तितलोच परिणाम जावपाक शकता, ते खातीर होमियोपथी उपचार करता आसतना एक दोतोर ह्या सगळ्या गजालींक म्हत्व दिता. म्हणून होमियोपथीन जावपी उपचाराक holistic health approach अशें म्हणटात.
होमियोपथीतले आनीक एक तत्व म्हळ्यार मनशाक एका वेळार कितलींय जरी दुयेंसां आसली तरी त्या वेळार एक सादें सोपें वखद दिवप. खूब वखदां दिवन दुयेंस चिड्डूपाचो यत्न आमी टाळटात.
Individualisation- व्यक्ती विशेशताय- दर एक मनीस हो वेगळो आसता. ताका जावपी त्रासूय वेगळे. दर एकट्याची वाड वेगवेगळ्या वातावरणांत जाल्ली आसता. प्रत्येकाचेर आसपी मानसीक तणाव, सरभोंवतणची परिस्थिती, खाण-जेवण, भावनीक स्थिती ही वेगळी आसता. म्हूण दर एका मनशाची प्रतिकार शक्त आनी ती करपाची पद्दत वेगळी आसता. एकाच घरांत रावपी दोन भावंडांक जेन्ना कसलेंय दुयेंस जाता, देखीक थंडी तेन्ना दिसपी लक्षणां दोगांय भितर वेगळींच आसता. मागीर दोगांकूय एकूच वखद कशें चलतलें. म्हूण होमियोपथी उपचार करतना आमी प्रत्येकाची बारीकसाणीन म्हायती घेवन प्रत्येकाक लागता तशें वखद दिवपाचो यत्न करतात.
होमियोपथीन दिल्या वखदाचो डोस सामको उणो आसता. जितलें वखदाचें प्रमाण कमी आनी डायल्युशन चड तितलीच वखदाची शक्त चड. हें भौतिकशास्त्राचें तत्व हांगां लागू जाता. देखून वखदाचो डोस कमी आशिल्ल्या वखदा खातीर दिसपी वायट परिणामूय तितलेच कमी आसतात.
हांव होमियोपथी वखदांच घेता अशें म्हाका खूब आयकुपाक येता. पूण होमियोपथी विशीं लोकांक कांय गैरसमजूय आसात. ती मूळ भारतीय वैजकी शास्त्र नाशिल्ल्यान आनी ताचो जाय तसो प्रचार नाशिल्ल्यान हे गैरसमज निर्माण जाल्यात जावये. असोच सगळ्यांत व्हडलो गैरसमज म्हळ्यार गूण पडटा गो, पूण बरें जावपाक खूब तेंप लागता न्हय? जर एका सभाग्याक एक दुयेंत धा वर्सां जालां जाल्यार तो कितलीशींच वर्सां बाकीचे जायते उपचार घेता आनी कांयच गूण पडना जातकच निमाणे कडेन होमियोपथी कडेन वळटा. तें धा वर्सांचे पोरणे दुयेंस मुळा सकट काडून उडोवपाक वेळ लागताच. त्या धा वर्सांन तें दुयेंस मनशाचे कुडीन रिगिल्लें आसता. तें काडून उडोवपाक कुडीक कितलोच वेळ दिवचो पडटलो न्हय. पूण तेंच जर सात दिसांचें दुयेंस आसलें आनीक रोखडोच जर ताचेर उपचार केलो जाल्यार कांय वरां भितरच तें दुयेंस निवळपाक शकता. केन्ना केन्ना तर कांय मिनटां भितरच दुयेंसांची लक्षणां ना जातना आमी पळयल्यांत.
आनीक एक लोकांचो समज आसा. तो म्हळ्यार होमियोपथी वखद घेतकच लक्षणांची तिव्रताय वाडटा. आनीकूय त्रास जावपाक लागता. हें हांव पुरायपणान चूक म्हणचेंना. पूण, जर तुमकां दिल्लें वखद बरोबर आसा आनी ताची कुवत सारकी आसा जाल्यार कांय वरां भितर ती तिव्रताय उणी जाता. कसलेंय दुयेंस बरो जावपाचो एक सैमीक अनुक्रम आसता. ताका आमी order of healing by natures law अशें म्हणटात. त्या अनुक्रमापणान सगळ्यांत शेवटाक येवपी दुयेसाचें लक्षण सगळ्यांत पयलीं बरें जावप आसता. आनी अशें करत जेन्ना सगळ्यांत सुरवातीक दिशील्लें लक्षण परतून दिसूंक लागता तेन्ना तें दुयेंस पुरायपणान बरें जातलें अशें मानू येता.
होमियोपथींत जगभरांत संशोधन जायत आसा. ह्याच सोदां खातीर जायत्या घातकी दुयेसांचेर लेगीत वखद मेळूंक लागलां. कर्करोगा सारक्या दुयेसांचेर लेगीत होमियोपथीन उपचार जातात. कालांतरान जेन्ना जेन्ना जगाचेर महामारिचें संकट आयलां तेन्ना तेन्ना ताचेर मात करपा खातीर होमियोपथीचो खूब मोलादीक वांटो आसा. 2020 वर्सा जाल्ल्या कोविडाच्या काळांत लेगीत फकत होमियोपथीची वखदां घेवन कितलेशेच दुयेंती बरे जाल्यात.
महात्मा गांधीन म्हणिल्लें- Homeopathy is the medicine of the poor. ह्या वखदाचें मोल उणें आशिल्ल्यान तें गरीब लोकांकूयू सहज परवडटा आनी भारतांत खुबशीं उत्पादन आस्थापनां आशिल्ल्यान तें शक्य जाता.
होमियोपथीची लोकप्रियता दिसान दीस वाडत आसा. मेट्रो शारांनी प्रसार चड आशिल्ल्यान वाडूय चड आसा. पूण गोंयातूय खूब लोक होमियोपथीचो उपचार घेतात. अशीच ह्या वैजकी शास्त्राची वाड जावन, सामान्य मनशाक परवडपी असो सुटसुटीत उपचाराचो पर्याय उपलब्ध जावं!
डॉ. वेदिका वाळके
8698387747
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
