भांगरभूंय | प्रतिनिधी
भारताचे सात्वीकसाईराज रंकीरेड्डी आनी चिराग शेट्टी हे जोडयेन संवसारीक बॅडमिंटन वस्तादपण सर्तींत कांश्या पदक जिखलें. हे सर्तींत दादल्यांच्या दोट्टी गटांत भारताक पयलेच खेपे पदक फावो जालां.
जपानाची राजधानी टोकियोंत जाल्ले सेमी फायनलींत भारताचे जोडयेक हार घेवची पडली. ताका लागून कांश्या पदक निश्चीत जालें आनी रुपें वा भांगरा पदक जिखपाची आस्त सोंपली. संवसारीक बॅडमिंटन वस्तादपण सर्तींत पदक जिखपी ही भारताची दुसरी जोडी थारली. हाचे आदीं अश्विनी पोनप्पा आनी ज्वाला गुट्टा हे जोडयेन 2011त पदक जिखिल्लें.
सेमी फायनलींत मलेशियाचे चिया आनी यिक हे जोडयेन सात्वीक-चिराग जोडयेक 20-22, 21-18 आनी 21-16 अशा गेमींनी हारयली.
भारताचे जोडयेन पयले गेमींत उत्कृश्ठ प्रदर्शन करून 22-20 फरकान जैत जोडलें. पूण, दुसरे गेमींत मलेशियाचे जोडयेन 18-21 फरकान जिखून मॅचींत 1-1 अशी बरोबरी सादली. तिसरे आनी निमाणे गेमींत भारताक 16-21 फरकान हार घेवची पडली आनी ताका लागून फायनलींत सुवात मेळोवपाची आस्त सोंपली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
