साकर वेवसाय वाडोवपा खातीर आंतरराष्ट्रीय परिशदेची गरज

भांगरभूंय | प्रतिनिधी

भारतां मदीं आत्मनिर्भरताय जावपाची तांक: डॉ. प्रमोद सावंत

आंतरराष्ट्रीय साकर प्रदर्शनाचें उक्तावण

पणजी: देशांतलो साकर वेवसाय वाडोवपा खातीर अशा आंतरराष्ट्रीय परिशदेची गरज आसा. हाका लागून शेतकारांक उर्बा मेळटा. अर्थवेवस्थेच्या सगल्या मळार आत्मनिर्भरताय जावपाची भारता मदीं तांक आसा अशें मुख्यमंत्री डॉ. प्रमोद सावंत हांणी सांगलें.

श्यामाप्रसाद मुखर्जी इनडोअर स्टेडियमांत आयोजीत केल्ल्या 80व्या वर्सुकी अधिवेशन आनी आंतरराष्ट्रीय साकर प्रदर्शनाच्या उक्तावणा वेळार ते उलयताले. ह्या वेळार गिरायक वेव्हार, अन्न आनी भौशीक राज्य मंत्री साध्वी निरंजन ज्योती, केंद्रीय सचीव सुधांशू पांडे तशेंच हेर अधिकारी, वेवसायीक हाजीर आशिल्ले.

80वें वर्सुकी अधिवेन आनी आंतरराष्ट्रीय साकर प्रदर्शनाची कार्यावळ 28 आनी 29 जुलय अशे दोन दीस श्यामाप्रसाद मुखर्जी स्टेडियमार सुरू आसा. हातूंत विवीध आधुनीक तंत्रज्ञानाचो वापर तशेंच साकरी विशीं नव्या संशोधनाचेर चर्चा जातली. हातूंत देशभरांतल्या साकर कारखान्याचे धनी, कंपनीं, शेतकार तशेंच संशोधक हाजीर आसात. दोन दिसांच्या चर्चासत्रांत दालनांचें प्रदर्शन लेगीत भरलां.

गोंय हें ल्हान राज्य. हांगा ऊसाचें उत्पन्न उणें आसा. फक्त एकूच संजिवनी साकर कारखानो आसा. अशें आसून लेगीत गोंयांत आंतरराष्ट्रीय दर्जाची शुगर एक्सपो परिशद गोंयांत जाता हें आमचे खातीर अभिमानाची गजाल. साकर उद्देगांत गोंय देशांत उदरगत करीत आसा. नव्या नव्या तंत्रज्ञानाच्या आदाराचेर गोंयांत साकर उत्पादन वाडयतात. खूबशे शेतकार ह्या वेवसायांतल्यान परिपूर्ण जाल्यात. महाराष्ट्र, कर्नाटक ह्या शेजारच्या राज्यांतले खूबशे शेतकार साकर उद्देगाचेर निंबून आसात. गोंयांतलो साकर उद्देग वेवसाया खातीर ही कार्यावळ लावकारी थारतली अशें मुख्यमंत्री डॉ. प्रमोद सावंत हांणी म्हणलें.

प्रधानमंत्री नरेंद्र मोदी हांचें सपन साकार जायत आसा. 2014 उपरांत देशान सगल्या मळार उदरगत केल्या. आतां देशांत खूबशा आधुनीक तंत्रज्ञाना वरवीं साकर तयार करतात. शेतकारांक बरें उत्पन्न मेळटा. ह्या चर्चासत्रांत शेतकारांक आनीक बरें मार्गदर्शन मेळटलें. हातूंत खूबशे शेतकार, संशोधक उद्देजक, भागधारक वांटेकार जाल्यात अशें डॉ. प्रमोद सावंत हांणी सांगलें.