भांगरभूंय | प्रतिनिधी
पुलिशेंत कागाळ नोंद, दोगां दुबावितांक अटक
म्हापशेंः सांताक्रुज-काबेसा एका तरणाट्याचेर पिस्तूल रोखून आनी तलवारीन हल्लो करून जिवेशी मारपाचो यत्न केल्ले प्रकरणांत पोरणें गोंय पुलिसांनी दोगां दुबावितांक अटक केल्या. चेतन दयानंद कोरगांवकार, (32, काबेसा-सांताक्रुज) आनी संतोष मंजूनाथ शेट्टी (21, बोंदीरवाडो-सांताक्रुज) अशी दुबावितांची नांवां आसात.
ही घडणूक शुक्रारा रातीं 12 वराच्या सुमाराक घडली. फिर्यादी सौरभ उदयशंकर कुमार (काबेसा-सांताक्रुज- मूळ बिहार) हो आपल्या रोलंड अपार्टमेंटातल्या फ्लॅटांत आशिल्लो. ह्या वेळार ह्याच अपार्टमेंटांत रावपी दुबावीत चेतन कोरगांवकार अानी ताचो साथीदार ताच्या फ्लॅटांत घुसले. तशेंच दुबावीत कोरगांवकार हाणें फिर्यादीच्या हड्ड्याचेर पिस्तूल रोखून दोगांयनीय ताका मारपेट केली. ह्या वेळार थंय फिर्यादीचे रूममेट आयले, ते पळोवन दोगूय दुबावीत थंयच्यान पळ्ळे.
ते उपरांत फिर्यादी पुलीस स्टेशनांत कागाळ नोंद करपाक वता आसतना परतून दुबावितांनी ताका आडायलो. तशेंच दुबावीत चेतन कोरगांवकार हाणें फिर्यादी सौरभ कुमार हाचेर तलवारीन हल्लो केलो. हातूंत फिर्यादी जखमी जालो.
ह्या प्रकरणांत पुलिसांनी वयल्या दोनूय दुबावितांक अटक केल्या. दुबावितां आड भादंसं. कलम 307, 341, 134 आनी आर्म कायदो कलम 3 आनी 25 खाला गुन्यांव दाखल केलो. फुडलो तपास पुलीस उपनिरिक्षक एडवीन डायस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
