भांगरभूंय | प्रतिनिधी
मुख्यमंत्र्या हस्तुकीं गोवा सरस प्रदर्शनाचें उक्तावण
पणजी: सरस विक्री प्रदर्शन हें देशाक स्वदेशी आनी आत्मनिर्भरतेचे उदरगती कडेन व्हरपाचो उपक्रम आशिल्ल्याचें सांगलें. ह्या विक्री-प्रदर्शना वरवीं गोंय राज्यांतल्या वेवसायिकांक आनी खासा करून आप मजत गटांच्या बायलांक उर्बा मेळटा. तशेंच देशाच्या हेर राज्यांतल्या कारागीरां कडल्यान नवे प्रयोग शिकपाची संद मेळटा, अशें मुख्यमंत्री डॉ. प्रमोद सावंत हांणी सांगलें.
कांपाल मैदानाचेर उत्तर गोंय जिल्हो ग्रामीण विकास एजन्सीन ग्रामीण विकास खात्याच्या जोड पालवान आयोजीत केल्ल्या गोवा सरस 2022-23 ह्या ग्रामीण आप मजत गटांच्या उत्पादन विक्री प्रदर्शनाचें उक्तावण केल्या उपरांत मुख्यमंत्री उलयताले.
सरस ह्या सरकाराच्या उपक्रमा वरवीं गांवगिर्या वेवसायाक आनी कारागीरांक आपल्या उत्पादनांचे विक्रे खातीर मार्केटिंग सुविधा उपलब्ध करून दिता. भारत सरकाराचें सहकार्य आशिल्ल्या सरस प्रदर्शनाचें दरेका वर्सा आयोजन करतात. ह्या प्रदर्शनांत हस्तकला, हातमाग आनी हेर कारागीरीची उत्पादनांची विक्री जाता. प्रदर्शनांत गोंयच्या आप मदत गटांसयत देशाच्या विंगड विंगड राज्यांतल्या कारागीरांच्या हस्तकला, हातमाग, रेडीमेड कपडे, तागाच्यो पिशव्यो, वस्ती, वखदी उत्पादनां, मातयेचीं आयदणां आनी हेर विवीध उत्पादनांची स्टॉल्स आसात.
मुख्यमंत्र्यान सरस विक्री प्रदर्शन आयोजना खातीर डीआरडीए आनी ग्रामीण विकास खातें तशेंच प्रदर्शनांत वांटेकार जाल्ल्या आप मजत गटांची तोखणाय केली आनी लोकांनी तेशेंच पर्यटकांनी गोवा सरस प्रदर्शनाक भेट दिवन खरेदी करपाचो उलो मारलो.
ह्या वेळार उपस्थितांमदीं जिल्हो पंचायत वांगडी सिद्धेश नायक, सचीव (ग्रामीण विकास) मेनिनो डिसोझा आनी हेरांचो आस्पाव आशिल्लो.
उत्तर गोंय जिल्हो ग्रामीण विकास एजन्सीचे प्रकल्प संचालक भूषण सावयकार हांणी मानेस्तांक येवकार दिलो. जाल्यार दक्षीण गोंय जिल्हो ग्रामीण विकास एजन्सीचे प्रकल्प संचालक श्री प्रवीण बरड हांणी निमाणे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
