भांगरभूंय | प्रतिनिधी
पणजीः गोंयांतल्या सरकारी मुळाव्या शाळांनी 88 कंत्राटी शिक्षकांची भरती करतले. त्यो सुवातो रजेचेर गेल्ल्या शिक्षकांचे सुवातेचेर पर्यायी वेवस्था म्हूण भरतले. नोल्हेंबराच्या 7. 8 आनी 9 तारखेक ह्या पदां खातीर मुलाखती जातल्यो, अशें परिपत्रक शिक्षण विभागान जारी केलां.
इत्सूक उमेदवारांनी शिक्षण संचालकांच्या नांवान अर्ज करपाक जाय. पर्वरेच्या शिक्षण संचालनालयाच्या कार्यालयांत सकाळीं 9.30 ते 10 वरां मेरेन आनी दनपारां 2 ते 2.30 वरां मेरेन अर्ज जमा करचे, अशें विभागा वतीन कळयलां. सकाळीं 10 उपरांत आनी दनपारां 2.30 वरां उपरांत अर्ज स्विकारचे नात, अशें परिपत्रकांत म्हणलां.
अर्जाचेर संबंदीत म्हालाचें नांव बरोवचें. तशेंच अर्जा वांगडा शिक्षणीक पात्रताय, नामो, 15 वर्सां गोंयांत राबितो आशिल्ल्याचो पुरावो, बायोडेटा आनी रोजगार नोंदणी प्रमाणपत्र ह्या सगल्या कागदपत्रांची एक प्रत जोडची, अशें परिपत्रकांत म्हणलां. ह्या सगल्या कागदपत्रांची एक प्रत मुलाखत मंडळाक दिवप लेगीत बंधनकारक आसा, अशेंय म्हणलां. उमेदवारान एचएससी प्रमाणपत्रां वांगडा डीएड पदविका वा पदवीचें शिक्षण घेतिल्लें आसपाक जाय. उमेदवाराची पिराय 45 वर्सां भितर आसपाक जाय. उमेदवाराक कोंकणी आनी मराठी ह्या दोनूय भाशांचें गिन्यान आसपाक जाय. निवड जाल्ल्या उमेदवाराक म्हयन्याक 39,015 रुपया मानधन दितले. एकाद्या निवड जाल्ल्या उमेदवारान मदींच काम सोडलें जाल्यार ताचें मानधन जप्त करतले, अशेंय परिपत्रकांत म्हणलां.
मुलाखतींचें वेळापत्रक
7 नोव्हेंबराक काणकोणां (5), धारबांदोड्यां (9), बार्देस (12), दिवचल (6) हे सुवांचेर मुलाखती जातल्यो. 8 नोव्हेंबराक केप्यां (8), मुरगांव (1), पेडण्यां (5), फोंड्यां (12) आनी 9 तारखेक साश्टी (7), सांगें (3), सत्तरी (10) आनी तिसवाडी (10) ह्या सुवातांचेर मुलाखती जातल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
