भांगरभूंय | प्रतिनिधी
प्रवीण आर्लेंकारः भाजपाच्या समाजीक न्याय सप्तकांतलो उपक्रम
भांगरभूंय । प्रतिनिधी
पेडणें: भाजपाच्या स्थापना दिसा निमतान मतदारसंघांत फाटल्या कांय दिसां सावन समाजीक सप्तक कार्यावळ आयोजीत केल्या. समाजा खातीर योगदान दिल्ल्या मनशांक सोदून काडून तांचो योग्य भोवमान आमी करतात. भलायकी केंद्राचे दोतोर, नर्शी आनी हेर सगळे कर्मचारी बरी सेवा करतात. कोरोना म्हामारी काळांत तांणी केल्लो वावर खऱ्यांनीच व्हड. तांच्या ह्या कामाचें कवतूक करचे, हे खातीर दोन ज्येश्ठ दोतोरांचो भोवमान केला, अशें आमदार प्रवीण आर्लेकार हांणी सांगलें.
पेडणें मतदारसंघांत भाजपा वतीन भाजपा स्थापना दिसा निमतान समाजीक न्याय सप्तकाचें आयोजन केलां. हे कार्यावळी खाला कासारवर्णेच्या हॉस्पिटलांत पेडणेंचें आमदार आनी भाजपा कार्यकर्त्यांनी बुधवारा वचून दुयेंतींची खबर घेतली, तांकां फळां वांटलीं तशेंच ह्या भलायकी केंद्राचे भलायकी अधिकारी डॉ. दामोदर नार्वेंकार आनी डॉ. अमीत सावंत ह्यो ज्येश्ठ दोतोरांचो शाल, यादस्तीक चिन्न, फुलां भेटोवन भोवमान केलो. ते उपरांत आमदार उलयताले.
ह्या वेळार पेडणें भाजपा मंडळाचे अध्यक्ष तशेंच चांदेल- हसापूरचे सरपंच तुळशीदास गांवस, समाजीक न्याय सप्तकाचे निमंत्रक सूर्यकांत तोरस्कार, आदले जिल्हो पंचायत वांगडी रमेश सावळ, तांबोशें मोपा उगवेंचे सरपंच सुबोध महाले, पंच अवनी गाड, सुधीर मळीक, भलायकी अधिकारी डॉ. दामोदर नार्वेंकार, डॉ. अमीत सावंत, डॉ. तनया, डॉ. साहिली हाजीर आशिल्ली.
तुळशीदास गांवस हांणी सांगलें, गरीब घटका मेरेन पावपाचो भाजपा सरकाराचो आनी पक्षाचो हांवेस आसा. तेच खातीर भाजपा स्थापना दिसा निमतान विवीध घटकांक उर्बा दिवपाचो वावर हातांत घेतला. ह्या वावरा खातीर आमदार आर्लेकार खूब मेहनत घेतात. समाजांतल्या विवीध घटकांचो गांवांत वचून सोद घेतात आनी तांचो योग्य भोवमान करतात, ही एक बरी गजाल. फुडारांतूय तांणी अशेंच काम करचें आनी कामां वरवीं आपली सेवा वाडोवची, अशें गांवस हांणी सांगलें.
जिल्हो पंचायत वांगडी रमेश सावळ हांणी सांगलें, भाजपा हो तळागाळांतल्या लोकांक वांगडा घेवन वचपी पक्ष. फुडारांतूय हें काम अशेंच चालू उरतले. लोकांनी ह्या पक्षा कडेन जोडचे आनी आपलीं कामां करून घेवचीं. आमदार आर्लेकार हांकां गरिबां विशीं तळमळ आसा. हे मुखारूय असोच वावर करून पेडणें मतदारसंघ उदगतीच्या मार्गार व्हरचो. सुबोध महाले हांणीय ह्या वेळार आपले विचार मांडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
