भांगरभूंय | प्रतिनिधी
बाणस्तारी मार्केट प्रकल्पाचें काम रोखडेंच पुराय करपाची मागणी
फोंडें: बिरेस्तारा दनपार ते शुक्रार दनपार मेरेन भरपी बाणस्तारीचो सप्तकी बाजार सद्या शुक्रारा दीसभर भरूंक लागला. ताका लागून बिरेस्तारा आनी शुक्रारा सांजवेळा येरादारीची कोंयडी जावपाचे प्रकार लोकां खातीर तकलीफोड जावंक लागल्या. येरादारी कोंयडेचो प्रस्न सोडोवपा खातीर नव्यान बांदिल्ल्या मार्केट प्रकल्पाचें काम रोखडेंच पुराय करपाची मागणी लोकां कडल्यान जायत आसा.
बाणस्तारी वाठारांत किल्याशाच वर्सां सावन बिरेस्तार दनपार ते शुक्रार दनपार मेरेन सप्तकी बाजार भरता. गोंयांतल्या विवीध वाठारांतल्यान लोक ह्या बाजारांत खरेदी खातीर येतात. पूण फाटल्या कांय म्हयन्या सावन शुक्रारा दीसभर लेगीत बाजार सुरूच उरत आशिल्ल्यान लोकांची धांदळ जायत आसा. वाठारांत वाहनां खातीर पार्किंगेक सुवात नाशिल्ल्यान येरादारी कोंयडेचो प्रस्न ह्या वाठारांतल्यान यो-वच करपी प्रवाशांक भेडसायत आसा. पयलीं शुक्रारा दनपार मेरेन सगले विक्रेते आपले साहित्य घेवन परतून वताले. पूण सद्या शुक्रारा लेगीत दीसभर बाजार भरत आशिल्ल्यान लोकांक मात हाचो त्रास सोंसचो पडटा.
बाणस्तारी जंक्शन काडून पणजी, माशेल आनी फोंड्यां वचपी खाजगी बशी प्रवाशी मेळोवपा खातीर कितलोसोच वेळ थंय रावत आशिल्ल्यान राष्ट्रीय म्हामार्गार येरादारीची कोंयडी जातना दिसून येता. कितलेशेचे फावटी येरादारी पुलीस आनी खाजगी बस चालकां मदीं बाचाबाची जावपाचे प्रकार हांगा घडत आसतात. हांगा बांदपी नव्या मार्केट प्रकल्पाचें काम पुराय जावपाचे वाटेर आसा. सरकारान हे संबंदी गंभीरतायेन लक्ष दिवन प्रकल्प लोकार्पण करून रस्त्याचे कुशीक भरपी बाजार प्रकल्पांत स्थलांतर करपाची मागणी लोकां कडल्यान जायत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
