भांगरभूंय | प्रतिनिधी
भांगरभूंय । प्रतिनिधी
वाळपयः सत्तरी तालुक्यांतल्या पिसुर्लें पंचायत वाठारांतल्या बेकायदेशीर चिऱ्यां खणीचेर खण आनी भूगर्भ खात्याच्या अधिकाऱ्यांनी धा दिसां पयलीं छापो घालून मशिनरी जप्त केल्ली. चिऱ्या खणी सुरू करपाक दिवपी जमीन धनयांचेर गुन्यांव दाखल करपाची शिफारस तांणी वाळपयच्या पुलीस निरीक्षकाक केल्ली. हाका लागून चिऱ्यां खणी बंद जावपाची शक्यताय उप्राशिल्ली. मात सरकारी यंत्रणेक आव्हान दिवंन व्हो खणी परत सुरू जावपाक लागल्यात.
खणी परत सुरू जावपाक लागिल्ल्यान लोकांनी अजाप उक्तायलां. सरकारी यंत्रणेची भिरांत नाशिल्ल्यान हे प्रकार जातात. सरकारी अधिकाऱ्यांच्या आशिर्वादान हे घडटा असो लोकांक दुबाव येवपाक लागला. फाटल्या सुमार धा वर्सां सावन सुरू आशिल्ल्या ह्या बेकायदेशीर चिऱ्यां खणींक लागून पर्यावरणाचेर वायट परिणाम जाता. खण खात्याच्या अधिकाऱ्यांनी छापो घालून धा दीस जातात म्हणसर फाटल्या चार दिसां सावन चिऱ्या खणी कडेन मशिनाची धडधड सुरू जाल्या.
पिसुर्लेचो सरपंच देवानंद परब हांणी चिऱ्यां खणी सुरू जावपाक लागल्यात ते खातीर नाराजी उक्तायल्या. पंचायतीत जायते फावट खण खातें आनी सत्तरीच्या उपजिल्होधिकारी कार्यालयांत कागाळी दाखल केल्यात. मात संबंदीत यंत्रणे कडल्यान कारवाय जायना अशें तांणे सांगलें. चिऱ्या खणी आड सरकारान फौजदारी गुन्यांव दाखल करून जमीन धनयांचेर दंडात्मक कारवाय करपाची मागणी परब हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
