भांगरभूंय | प्रतिनिधी
वास्को: सड्यार आंतरराष्ट्रीय पेंवपा तळ्याचें पंचायत मंत्री मॉवीन गुदिन्हो हांचे हाजिरेंत खेळां मंत्री गोविंद गावडे हांचे हस्तुकीं काल (सोमारा) लोकापर्ण केलें. ह्या वेळार गावडे हांणी सरकाराची वास्तू ही स्वताची वास्तू समजून तिची योग्य ती जतनाय घेवची अशें आवाहन केलें. जाल्यार लोकार्पणाचें औचित्य सादून गुदिन्हो हांणी दाबोळी मतदारसंघांत पेंवपा तळें जावचें अशी मागणी केली.
ह्या सुवाळ्याक मंत्री मॉवीन गुदिन्हो, मंत्री गोविंद गावडे हांचे सयत मुरगांवचे आमदार संकल्प आमोणकार, वास्कोचे आमदार कृष्णा साळकार, मुरगांवचे नगराध्यक्ष दामोदर कासकार, नगरसेविका मंजुषा पिळर्णकार, नगरसेविका श्रद्धा आमोणकार, नगरसेवक दामोदर नायक, प्रजय मयेंकार, खेळां खात्याचें संचालक अजय गावडे आनी हेर मानेस्त हाजीर आशिल्ले.
गुदिन्हो हांणी आमी लोकांची कामां केल्ल्यान भाजपा सरकार तिसरे फावटी सत्तेर आयिल्ल्याचें सांगलें. ह्या पेंवपा तळ्याचो उपेग गोंयच्या सगल्या लोकांक जातलो अशें तांणी म्हणलें.
गोविंद गावडे हांणी हें पेंवपा तळें आदले मंत्री आनी मुरगांवचे आदले आमदार मिलिंद नायक हांच्या यत्नाक लागून जाल्ल्यान तांचे उपकार मानले. ह्या पेंवपा तळ्या खातीर हेर सुविधा उपलब्ध करतले, जांचो उपेग तरणाट्यांक जातलो. थळाव्यां खातीर थारावीक वेळ थारायतले. तेच प्रमाण प्रशिक्षण दितले अशें तांणी सांगलें.
ह्या पेंवपा तळ्याची योग्य जतनाय घेवन ताचो बरो उपेग करपाची गरज आसा. नाजाल्यार हो प्रकल्प धवो हती जातलो अशें आमदार आमोणकार हांणी म्हणलें. हांगा पातळपी कोयराचे घाणीचेर उपाय येवजण जावंक जाय जाल्यारूच ह्या तळ्याचो योग्य उपेग जातलो अशें आमोणकार हांणी स्पश्ट केलें.
आमोणकार हांच्या नशिबांत आशिल्ल्यान तांकां रेडिमेड पेंवपा तळें मेळ्ळें अशें मंत्री गुदिन्हो हांणी म्हणलें. पूण ह्या प्रकल्पाचें स्रय हांव घेवचो ना. हाचें स्रय आदले आमदार आनी मंत्री मिलिंद नायक हांचें आसा. म्हज्या कार्यकाळांत हांव जे प्रकल्प हाडटलों ताचें स्रय मात नक्कीच घेवं अशें आमोणकारान म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
