भांगरभूंय | प्रतिनिधी
ः झुआरीनगरांतल्या सडा अर्बन सहकारी सोसायटी लिमिटेडांत 1.19 कोटी रुपयांचें गुड्डुलासांव आनी फटवणूक केल्ल्या प्रकरणांत वेर्णे पुलिसांनी आदले वेवस्थापक उमा एन. होन्दाद आनी तिचो सांगाती सफान खान ह्या दोगांक बिरेस्तारा अटक केली. अटक केल्ल्या दोगां दुबावितांक वास्कोच्या पयलो वर्ग न्यायालयान चार दिसांची पुलीस कोठडी फर्मायल्या.
मेळिल्ले म्हायती प्रमाण ह्या प्रकरणांत वास्कोच्या सडा अर्बन सहकारी सोसायटी लिमिटेडाचे सरवेवस्थापक प्रतीश लोटलीकार हांणी 6 आॅक्टोबर 2021 दिसा झुआरीनगर फांट्याचे आदले वेवस्थापक उमा एन. होन्दाद आनी तिचो सांगाती सफान खान हांचे आड कागाळ केल्ली. दुबावीत होन्दाद हांची 20 एप्रील 2020 दिसा सोसायटीच्या झुआरीनगर फांट्यांत वेवस्थापक पदार नेमणूक केल्ली. उपरांत दुबावीत होन्दादान तिचो सांगाती खान हाच्या आदारान सोसायटींत कायम ठेवी दवरिल्ल्या 1 कोटी 19 लाख 42 हजार 717 रुपयांचे रकमेचेर बनावट रीण वांटप करून सोसायटीक तशेंच संबंदीत गिरायकांक फटयलां अशें कागाळेंत म्हणलां.
21 आॅगस्ट 2021 दिसा केल्ले अंतर्गत हिशेब तपासणे वेळार कांय फांट्यांनी जाल्लें हें गुड्डुलासांव उक्ताडार आयलें. उपरांत सोसायटीन प्रमाणीत चार्टर्ड अकावटंटा वरवीं विशेश हिशेब तपासणी करतना वयलो घोटाळो मुखार आयलो. उपरांत सोसायटीन वेर्णे पुलीस स्टेशनांत कागाळ केली. हाची दखल घेवन त्या वेळा वयले पुलीस निरिक्षक प्रशल नायक देसाय हांणी वयल्या दुबाविता आड सोसायटीची आनी गिरायकांची 1.19 कोटी रुपयांची फटवणूक केल्ल्या प्रकरणांत गुन्यांव दाखल करून तपास सुरू केलो.
मजगतीं, दोनूय दुबावितांनी मडगांवच्या दक्षीण गोंय जिल्हा आनी सत्र न्यायालयांत अटकपूर्व जामीन अर्ज दाखल केलो. ह्या प्रकरणांत न्यायालयान 3 मार्च 2022 दिसा दोगां दुबावितांचो अटकपूर्व जामीन अर्ज भायर मारलो. उपरांत दोगूय दुबावीत फरार जाले.
मजगतीं, दोनूय दुबावितांनी न्यायालयाच्या वयल्या निवाड्याक मुंबय उच्च न्यायालयाच्या गोंय खंडपीठांत आव्हान दिलें. ही खबर वेर्णे पुलीस स्टेशनाचे निरिक्षक डायगो ग्रासियस हांकां कळ्ळी. तशेंच दोनूय दुबावीत कोलव्यां आशिल्ल्याची माहिती निरिक्षक ग्रासियस हांकां मेळ्ळी. तांणी हेर पुलीस पथकांच्या मजतीन त्या दोगांक चवकशे खातीर बुधवारा ताब्यांत घेवन अटक केली.
अटक केल्ल्या दोगां दुबावितांक पुलीस कोठडे खातीर वास्कोच्या पयलो वर्ग न्यायालयांत बिरेस्तारा हाजीर केले तेन्ना न्यायालयान दुबावितांक चार दीस पुलीस कोठडी फर्मायली.
मजगतीं, दोगां दुबावितांक पुलिसांनी अटक केल्ल्याची माहिती बिरेस्तार सकाळीं अतिरिक्त सरकारी अभियोक्ते निखील वझे हांणी खंडपीठांत दिली. हाची दखल घेवन खंडपीठान दोगां दुबावितांक अटक केल्ल्यान दुबावितांनी दाखल केल्ले अटकपूर्व जामीन अर्ज निकालांत काडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
