भांगरभूंय | प्रतिनिधी
खबरां संस्था
युजीन (अमेरिका) : भारताचो गोल्डन बॉय नीरज चोप्रान परत एक फावट इतिहास रचलो. संवसारीक अॅथलेटिक्स चॅम्पियनशीप सर्तींत ताणे रुप्या पदक जिखून 19 वर्सांचो भारताचो पदकांचो दुकोळ सोपयलो. अमेरिकेंतल्या ओरगॉनांत सुरू आशिल्ले भालो फेकीचे फायनल फेरयंत नीरजान 88.13 मीटरांची नोंद केली. हे कामगिरी उपरांत ताची सगल्या पांवड्यांर तुस्त-तोखणाय चल्ल्या. अंजू बॉबी जॉर्ज उपरांत संवसारीक अॅथलेटिक्स चॅम्पिय़नशीप सर्तींत जैताची कामगिरी करपी नीरज चोप्रा हो दुसरो भारतीय खेळगडो थारला. अंजू बॉबीन लांब उडयेंत कांस्या पदक जिखल्लें. सुमार 19 वर्सां उपरांत भारताक पदक मेळोवन दिलां.
39 वर्सां सावन सुरू आशिल्ले संवसारीक अॅथलेटिक्स सर्तींत भालो फेकींत भांगरा पदक जिखपाचें भारताचें सपन पुराय जावपाक शकलें ना, मात 19 वर्सां उपरांत देशाक पदक फावो जालां. अंजू बॉबीन 2003 वर्सा लांव उडयेंत कांस्या पदक जिखल्लें. हे सर्तींत रुप्या पदक जिखपी नीरज पयलो खेळगडो थारला.
ऑलिम्पिकांत भांगरा पदक
टोकियो ऑलिम्पिकांत नीरज चोप्रान भारताक भांगरा पदक जिखून दिल्लें. पोरूं ऑलिम्पिकांतलो ट्रँक आनी फिल्डांतलो 120 वर्सांचो पदकांचो दुकोळ सोपोवन देशाक भांगरा पदक मेळोव दिवपी तो पयलो भारतीय थारल्लो. संवसारीक अॅथलेटिक्स सर्त 1983 सावन सुरू जाल्ली. आतां मेरेन एकाय भारतियाक भांगरा पदक मेळोवप शक्य जालें नाशिल्लें. नीरजान ती कामगिरी करून दाखयली.
नेटाच्या वाऱ्याक लागून परिस्थिती कठीण आशिल्ली. तीन थ्रो फावल जाले. दरेक खेप भांगरा पदक मेळटलें अशें जायना. मात हांव यत्न सोडचों ना अशें पदक जिखले उपरांत घेतिल्ले पत्रकार परिशदेंत ताणे सांगलें. अँडरसनान परिस्थितीचो बरो उपेग केलो. दरेक चॅम्पियनशीप दरेका खेळगड्या खातीर वेगळी आसा. कोणाची कोणा कडेन तुळा करपाक जायना अशें ताणे सांगलें.
नीरजान इतिहास रचतकूच प्रधानमंत्री नरेंद्र मोदी हांणी ताका परबीं भेटयलीं. आमच्या सगळ्यांत प्रतिश्ठीत अॅथलेटींतल्या एक आशिल्ल्या नीरज चोप्रान रुप्या पदक मेळयलें हो देशा खातीर एक मोलादीक खीण आसा अशें तांणी आपल्या ट्विटांत म्हणलां.
नीरजाची कामगिरी
पयलो थ्रो- फावल
दुसरो थ्रो- 82.39 मीटर
तिसरो थ्रो- 86.37 मीटर
चौथो थ्रो- 88.13 मीटर
पांचवो थ्रो- फावल
सव्वो थ्रो- फावल
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
