संवसारांतलो सगळ्यांत जाण्टो मनीस अंतरलो
भांगरभूंय | प्रतिनिधी
काराकास, खबरां संस्था: संवसारांतलो सगळ्यांत जाण्टो मनीस जुआन व्हिसेंट पेरेझ मोरा हाका पिरायेच्या ११४ व्या वर्सा मरण आयलें. जुआंव हो व्हेनेझुएलाचो रावपी आशिल्लो. फेब्रुवारी २०२२ वर्सा ताका गिनीज बुक ऑफ वर्ल्ड रेकॉर्डान सगळ्यांत जाण्टो मनीस म्हूण जाहीर केलो. त्या वेळार ताची पिराय ११२ वर्सां आनी २५३ दीस आशिल्ली.
व्हॅनेझुएलाचे अध्यक्ष निकोलस मादुरो हांणी ‘एक्सा’ वरवीं जुआंवाच्या मरणाची घोशणा केली. जुआंव हाचो जल्म २७ मे १९०९ दिसा जालो. तांकां ११ भुरगीं, ४१ नातरां, १८ पणटुरां आसात.
गिनीज बूक आॅफ रेकाॅर्डाच्या अहवालाप्रमाण जुआंव हो वेवसायान शेतकार आशिल्लो. ताच्या दीर्घायुष्याचें गुपीत म्हळ्यार कश्ट, वेळार विसव आनी दर दिसा ऊसा पसून केल्लो सोरो पियेवप अशें तांणी सांगिल्लें.
जुआंवाक कसलेंच गंभीर दुयेंस नाशिल्लें. तशेंच भुरगेपणांतलो चडसो काळ ताका याद जातालो. केक, सूप आनी आवाकाडो खावपाक ताका खूब आवडटालें. सॅटर्निनो दे ला फुएन्टे गार्सिया हाका १८ जानेवारी २०२२ दिसा पिरायेच्या ११२ वर्सा आनी ३४१ दिसांनी मरण आयलें. हाचे उपरांत जुआंवाक संवसारांतल्या सगळ्यांत जाण्ट्या मनशाचो भोवमान मेळ्ळो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
