भांगरभूंय | प्रतिनिधी
म्हापशें: म्हापशेंचें जागृत देवस्थान आनी म्हापशेंकारां सयत समेस्त भाविकांचो राखणदार म्हूण श्रद्धा आशिल्ले श्री देव बोडगेश्वर संस्थानाचो 30 वो वर्धापनदीस सुवाळो बुधवारा व्हड उमेदीन मनयलो. ह्या वेळार देवाक देवस्थान समिती आनी भाविकां कडल्यान भांगराचो दांडो श्रीचरणांत अर्पण केलो. जाल्यार बिरेस्तारा सावन बोडगेश्वर देवस्थानाच्या 88 व्या जात्रोत्सवाक सुरवात जाता.
बुधवारा सकाळीं देवळांत भांगरचो दांडो हाडून थंय विधीवथ पुजा अर्चा केली. उपरांत दनपारां देवस्थानाचे अध्यक्ष आनंद भाईडकार हांचे हस्तुकीं श्रीचरणांत हो भांगराचो दांडो अर्पण केलो. उपरांत आरती, तिर्थप्रसाद आनी महाप्रसादाची कार्यावळ जाली. भांगराचो दांडो अर्पण सुवाळो पळोवपा खातीर देवळांत भाविकांनी एकूच गर्दी केल्ली.
वर्धापनदिसा निमतान उपसभापती ज्योशुआ डिसोझा, नगराध्यक्षा शुभांगी वायंगणकार, उपनगराध्यक्ष चंद्रशेखर बेनकार, आमदार आलेक्स रेजिनाल्ड, आमदार केदार नायक, भाजप प्रदेशाध्यक्ष सदानंद शेट तानावडे, आदले आमदार रमाकांत खलप हांचे सयत भाविकांनी देवळाक भेट दिवन श्रींचें दर्शन घेतलें.
ह्या भांगराच्या दांड्याचेर वट्ट खर्च 67 लाख 69 हजार 752 रुपया इतलो आयला. हो दांडो तयार करपा खातीर ज्या देणगिदारांनी मजत केली तांचे श्रीचरणी मुखार शाल आनी श्रीफळ दिवन उपकार आठयले. हातूंत उद्देजक, सरकारी अधिकारी आनी हेर भाविकांचो आस्पाव आसा. हो दांडो श्री देव बोडगेश्वराच्या जात्रोत्सवाच्या दिसांनी आनी श्रावण म्हयन्यांतल्या सगल्या आयतारच्या दिसा (देवाचो दीस) श्रींमुखार दवरतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
