श्रीलंकेंत हिंसाचार; प्रधानमंत्र्यांच्या घराक उजो

भांगरभूंय | प्रतिनिधी

खासदारा सयत 5 जाणांक मरण, 200 वयर नागरीक जखमी

खबरां संस्था
कोलंबोः श्रीलंकेंतले अर्थीक संकश्ट अदीक खर जालां. सोमारा महिंदा राजपक्षे हांणी प्रधानमंत्रीपदाचो राजिनामो दिले उपरांत मोट्या प्रमाणांत हिंसाचाऱ्याचो घडणुको घडल्यात. सोमारा रातीं हंबनटोटांतल्या महिंदा राजपक्षे हांच्या घराक तशेंच पूर्वजांच्या घराक आंदोलकांनी उजो लायला. ते भायर कांय मंत्र्यांच्या घरांकूय उजो लावपाच्यो घडणुको घडल्यांत. श्रींलंकेंत जाल्ल्या हिंसाचारांत एका खासदारा सयत पांच जाणांक मरण आयलां, जाल्यार 200 वयर नागरीक जखमी जाल्यात.
अर्थीक संकश्टाक लागून प्रधानमंत्री महिंदा राजपक्षे हांणी राजिनामो दिला. पूण ते उपरांत देशांत हिंसाचार वाडला. म्हारगायेचो हुलोप बशिल्ली जतना रस्तार देंवन आंदोलनां करतात. आंदोलकांनी तोडफोड करून हिंसाचार सुरू केला. तशेंच राजपक्षे हांच्या समर्थकांचेर हल्ले केल्यात.
राजपक्षे हांच्या राजिनाम्या उपरांत हिंसाचार जाल्ल्या वाठारांत पुलिसांनी कर्फ्यू लागू केला.
श्रीलंकेचे राजिनामो दिल्ले सुरक्षेचे नदरेन प्रधानमंत्री महिंदा राजपक्षे आनी तांच्या कुटुंबियांक हॅलिकॉप्टरांतल्यान नौदळ तळार हालयल्यात. तांच्या राजिनाम्या उपरांत देशांत हिंसाचाराच्या घडणुकांनी वाड जाल्या.

सरकारी मालमत्तेचें लुकसाण केल्यार थेट गुळी घालात

संरक्षण मंत्रालयाचो लश्कराक आदेश

श्रीलंकेंत परिस्थिती आतां नियंत्रणा भायर गेल्यात. ह्या देशाचो यादवी कडेन प्रवास सुरू जाला. श्रीलंकेंत जावपी हिंसाचार पळयल्यार संरक्षण मंत्रालयान लश्कराक थेट गुळयो घालपाचो आदेश दिला. जे नागरीक सरकारी मालमत्तेचें लुकसाण करतात वा जे नागरीक हिंसाचारांत वांटो घेतात तांकां थेट गुळयो घालपाचो आदेश संरक्षण मंत्रालयान दिला. सध्या श्रीलंकेंत संचारबंदी लागू केल्या.

विरोधकांची राष्ट्रपतीच्या राजिनाम्याची मागणी
श्रीलंकेंतलो मुख्य विरोधी पक्ष समगी जना बालावेगया (एसजेबी) हांणी श्रीलंकेंत सरकार स्थापन करपाचो प्रस्ताव मांडिल्लो. मात राष्ट्रपतींनी तो प्रस्ताव न्हयकारला. ते उपरांत एसजेबीन राष्ट्रपतींच्या राजिनाम्याची मागणी केल्या. श्रीलंकेंत अराजकतेचें वातावरण आसतना राजकी संघर्श सुरू आसा. दोनूय वटेनचे समर्थक एकामेकां आड पेटून उठल्यात.