भांगरभूंय | प्रतिनिधी
पणजी, प्रतिनिधी: उत्तर गोंयचे खासदार तशेंच केंद्रीय मंत्री श्रीपाद नायक हांकां पक्षांत खूब मान आसा. तांणी गोंय आनी भारत देशा खातीर खूब कितें केलां. तशेंच फाटलीं ४० वर्सां पक्षा खातीर ते वावुरल्यात. आतां तांचें वय जालां. तांणी आतां विसव घेवचो. सध्या कार्यकर्त्यांनी नव्या उमेदवाराची मागणी केल्या. पक्षान म्हाका लोकसभेची उमेदवारी दिल्यार हांव उत्तर गोंयच्यान वेंचणुकेक देंवपाक तयार आसा, अशें मांद्रेंचे आदले आमदार दयानंद सोपटे हांणी सांगलें.
लोकसभा वेंचणुकेक चारूच म्हयने उरल्यात. ताका लागून गोंयांत फुडार्यांनी राजकी मळाचेर हालचालींक सुरवात केल्या. मांद्रेंचे भाजपाचे आदले आमदार दयानंद सोपटे हांणी आयज सकाळीं केल्ल्या विधानाची राजकीय पांवड्यार चर्चा सुरू जाल्या. सोपटे हांणी लोकसभेच्या उत्तर गोंय मतदारसंघांतल्यान वेंचणूक लढपाची इत्सा उक्तायल्या. तांणी ह्या वेळार केंद्रीय मंत्री श्रीपाद नायक हांकां राजकारणांतल्यान विसव घेवपाची मागणी केल्या.
जर म्हज्या नांवांचो विचार केल्यार हांवूय वेंचणूक लढपाक तयार आसां. उत्तर गोंयांत फाटल्या कितल्याशाच वर्सां सावन संघटणेच्या कामाची जापसालदारकी पक्ष म्हाका दिता आनी ती हांव बरे तरेन सांबाळटां. पक्षा खातीर हांव खूब वावुरलां. पक्षान म्हाका संद दिल्यार आपूण ती योग्य तरेन वापरतलों, अशें सोपटे हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
