श्रीपादभाऊ सायलंट, जाल्यार तानावडे अॅक्टीव्ह मोडार !

भांगरभूंय | प्रतिनिधी

लोकसभा 2024 वेंचणुकेचें वारें आनी घडामोडीय सुरू

भांगरभूंय I विश्वनाथ नेने
पणजीः लोकसभा वेंचणुकेचें वारें आतां पसूनच व्हांवपाक लागलां. आमी जर सध्याचे राजकी घडामोडींचेर बारीक नदर मारली जाल्यार इत्सुकांनी आतां पसूनच तयारेक नेट लायला. इत्सुकांनी उक्तेंपणान उमेदवारीचेर दावेदारी करुंक ना, पूण भितरल्यान चक्रां घुंवपाक लागल्यात, हे सहज कोणाकूय कळटले. सध्याचे भाजपाचे उत्तर गोंयांतलेच स्थितीचो नियाळ घेयत जाल्यार ताचो अदमास येता.
उत्तर गोंयात फाटले 5 खेपे भाजपाचे जेश्ठ फुडारी श्रीपाद नायक प्रतिनिधीत्व करतात. ते भाजपाचे एक मुळावे फुडारी. केंद्रांतूय तांणी जायती खातीं हाताळ्ळ्यांत. मात हे खेपे श्रीपाद नायक हांकां प्रतिस्पर्धी म्हूण नांव फुडें येता, ते भाजपाचे प्रदेश अध्यक्ष सदानंद शेट तानावडे हांचें. आनी सध्याच्यो राजकी घडामोडी पळयत जाल्यार तानावडे बरेच अॅक्टीव्ह जाल्ले दिश्टी पडटात. हालीच उत्तर गोंयांत ज्या ज्या मतदारसंघांत वेगळ्योवेगळ्यो कार्यावळी जाल्यो तांतूत तांची लक्षवेधी हाजेरी सगल्यांनी पळयली. पर्वरीचे आमदार मंत्री रोहन खंवटे हांचो वाडदीस आसूं वा दुसरे दिसाची तांची नोमोझो ही कार्यावळ आसूं, पेडण्याचे आमदार प्रविण आर्लेकार हांणी लोका खातीर दवरिल्ले भलायकी शिबीर आसूं, वा व्हड संख्येन अनुयायी आशिल्ल्या स्वामी ब्रम्हेशानंद हांचो वाडदीस आसूं, अशा आनी हेर साबार कार्यावळींनी सदानंद शेट तानावडे आतां स्वता हाजीर आसतना दिसतात.
दुसरे वटेन श्रीपाद भाऊंचे बाबतीत हालीच्या तेंपार ज्यो गजाली घडटात त्यो पळयत जाल्यार भाऊंक भाजपा मदीं ‘सायडलायन’ करपाचें काम सुरु जालां हे स्पश्ट कळटा. ताचें उदाहरण म्हळ्यार दोनापावला सोबितीकरण केल्ल्या नव्या जेटीचें. सध्याक श्रीपाद भाऊ कडेन केंद्रीय पर्यटन राज्य मंत्री पदाचो ताबो आसा. त्या जेटीच्या कामा खातीर स्वता भाऊनूय केंद्रा कडेन म्हत्वाचीं फाटपुवरण केल्या, अशें आसतना श्रीपाद भाऊंक जेटीच्या उक्तावणाचें आपोवणें ना. हाचे वयल्यान स्पश्ट अर्थ काडूं येता. बरे ही पयलीच खेप न्हय, नव्या झुवारी पुलाच्या उक्तावणा वेळारुय श्रीपाद भाऊंचे बाबतीत ‘प्रोटोकोल’ पाळूंक नाशिल्लो. श्रीपाद भाऊय आतां हे सदच्या प्रकारा आड उक्तेपणान आपली नाराजी उलोवन दाखोवपाक लागल्यात.

राजकी, संघटनात्मक अणभव आनी संयमी स्वभाव !
सदानंद शेट तानावडे हांचो राजकी आनी संघटन असो दोनूय पद्दतीचो प्रवास आसा. सुरवातीक संघाचो स्वयंसेवक, उपरांत कॉलेज जिणेंत अभावीप, तेच बरोबर राम जल्म भूंय आंदोलनांत सक्रीय वांटो. ते उपरांत भाजपाचे बूथ अध्यक्ष, थिवी मंडळ अध्यक्ष, भाजपाचे सचीव, सरचिटणीस ते आतां प्रदेश अध्यक्ष असो संघटनात्मक वावर आसा. तशेंच पंच, उपसरपंच, सरपंच, आमदार असो राजकी प्रवास तानावडेचे गांठीक आसा. तांच्या ह्या सगल्या प्रवासांत दोन गजाली सामक्यो म्हत्त्वाच्यो थारल्यात, त्यो म्हळ्यार तांचो हासरो आनी संयमी सभाव.

तानावडे कडेन सध्याक आसा हुकमाचो एक्को !
उत्तर गोंयांत सध्याक भाजपाचे सगल्यांत ताकदवान फुडारी आसात ते मंत्री विश्वजीत राणे. स्वता आपल्या वाळपय मतदारसंघा सयत पर्ये मतदारसंघ मेळून पुराय सत्तरी म्हालाचेर विश्वजीत राणे हांचे निर्विवाद वर्चस्व आसा. स्वता आपूण व्हड मताधिक्क्यान जैतिवंत जावन घरकान्न डॉ. देविया राणे 14 हजारां वयर मताधिक्क्याचो विक्रम करीत जैतिवंत थारल्या. जेन्ना सावन विश्वजीत भाजपांत आयला तेन्ना सावन सदानंद शेट तानावडे आनी विश्वजीत राणे हांचे संबंद सामके बरे आसात. सदाच व्हड म्हत्वाकांक्षा मतींत दवरुन राजकारण करपी विश्वजीत राणे हे लेगीत प्रदेशाध्यक्ष सदानंद शेट तानावडे हांकां धरुन आसात. विश्वजीत राणे हांच्या उतराक केंद्रातूय वजन आसा. ह्यो सगल्यो गजाली मतींत धरल्यार विश्वजीत राणे हांचो तेंको तानावडे हांकां म्हत्त्वाचो थारतलो.
पार्सेकार, उत्पला विशीं तानावडे हांचें सुचक विधान
कांय दिसा फाटीं एका मुलाखतींत सदानंद शेट तानावडे हांणी प्रस्नाक जाप दितना प्रा. लक्ष्मीकांत पार्सेकार आनी उत्पल पर्रीकार हांचे विशीं सादूर आनी सुचक विधान केल्लें. दोगांचेय भाजप घरवापसीचेर केंद्रीय फुडारी कितें तो निर्णय घेतले अशें तानावडे हांणी सांगिल्लें. तशेंच उत्पला परस पार्सेकार हांणी भाजप पक्ष सोडलो तेन्ना चड वायट दिशिल्ले अशेंय ते उलयिल्ले. पयलीं तानावडे हांचें उलोवप पार्सेकारांचे बाबतीत खर आसताले. मात आतां तानावडे हांचें उलोवप मात्शें सौम्य जाल्या. घडये हाकाय 2024 त जावपी लोकसभा वेंचणूक कारण आसूं येता. जर पार्सेकार हांची भाजपांत घरवापसी जाली जाल्यार लोकसभे खातीर ती अदीकची ताकद थारतली. पार्सेकार हांचो भाजपा कार्यकर्त्यां वांगडा आशिल्लो जनसंपर्क ते भायर तांची मांद्रेंतलीं स्वताची ताकद हाचो लाव भाजपाच्या लोकसभेच्या उमेदवाराक निश्चीत जातलो.