भांगरभूंय | प्रतिनिधी
किदाम्बी श्रीकांत, लक्ष्य सेन आनी एचएस प्रणॉय ह्या भारताच्या खेळगड्यांक 17 ते 22 जानेवारी मेरेन चलपी इंडिया ओपन बॅडमिंटन बॅडमिंटन सर्तींत एकाच क्वॉर्टरांत कठीण ड्रॉ मेळ्ळा. बीडब्ल्यूएफ वर्ल्ड टूर सर्तीक अंदूं सुपर 750 श्रेणींत अपग्रेड केला.
आदली वस्ताद आनी दोन खेपेची ऑलिम्पीक पदक जैतिवंत भारताची पी व्ही सिंधू आपली पयली मॅच सुपनिदा कटेथोंग आड खेळटली. थायलॅण्डाचे हे खेळगडयेन पोरूं सेमी फायनलींत सिंधूक हारयिल्ली. जाल्यार सध्याची वस्ताद जोडी सात्विकसाईराज रंकीरेड्डी आनी चिराग शेट्टी दादल्यांच्या दोट्टी गटांत पयले सुवाते वयली जोडी डॅनमार्काचे जेपे बे आनी लेसे मोल्हेडे हांच्या आड खेळटली.
सगल्यांक कठीण स्थिती दादल्यांच्या एकोड्या गटांत भारताच्या खेळगड्यां खातीर आसा. श्रीकांत, सेन आनी प्रणॉय हांकां एकाच क्वॉर्टरांत दवरल्यात. हाचो अर्थ हातूंतलो फकत एकलोच क्वॉर्टरफायनल हुपपाक शकतलो. ह्या क्वॉर्टरांत सध्याचो संवसारीक वस्ताद आनी ऑलिम्पीक चॅम्पियन विक्टर एक्सेलसेन, चीनाचो शि यू क्युई आनी जपानाचो केंटो मोमोटा हांचो आस्पाव आसा.
फाटलो वस्ताद सेन आपल्याच देशाच्या प्रणॉया आड खेळटलो. हातूंत जिखपी खेळगडो मोमोटा आड खेळटलो. तशेंच आदलो वस्ताद श्रीकांत आपली पयली मॅच एक्सेलसेना आड खेळटलो.
ऑगस्टांत राष्ट्रकूल खेळां सर्तींत खोटेक जाल्ले दुखापती उपरांत सिंधू बॅडमिंटन कोर्टांतल्यान पयस आसा.
सुरवातीच्या मॅचींनी जैत जोडपाक येसस्वी थारता जाल्यार क्वॉर्टरफायनलींत तिची मॅच चेन युफेई आड जावये. तशेंच आदली पयल्या क्रमांकाची खेळगडी सायना नेहवाल आपली पयली मॅच डॅनमार्काचे मिया ब्लिचफिल्ड्ट आड खेळटली. तशेंच मालविका बंसोड आनी आकर्षि कश्यप पयले खेपे सुपर 750त खेळटलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
