भांगरभूंय | प्रतिनिधी
भांगरभूंय । प्रतिनिधी
वाळपयः शुक्राराक सांजे अकस्मात पडिल्ल्या उटंगाराच्या पावसाक लागून वाळपय शारांतली जन जीण सामकी विस्कळीत जाली. सुमार दोन वरां पडिल्ल्या ह्या पावसाक लागून शारांतलें चडशे रस्ते उदका पोंदा गेल्ल्यान येरादारीक आडखळ जाली. बऱ्याच वाठारांतली तशेंच गांवांतली वीज पुरवण बंद पडली. वादळी वाऱ्याक लागून शेतां आनी बागायतीचें लुकसाण जाल्ल्याची खबर आसा.
ढगफुटी जाल्ले भशेन घसघश्यांनी हो पावस पडलो. शारांतल्या गटार वेवस्थेची स्थिती ह्या पावसाक लागून उक्ती पडली. कांय लोकांच्या घरांत उदक वचपाचे प्रकार घडले. फाटल्या पंदरा दिसां सावन सत्तरी तालुक्यांत साजे पावस पडत आसना. शुक्रराक सांजे मळबांत अकस्मात ढग जमा जाले. दनपारां 3च्या सुमाराक पावसाक सुरवात जाली. दोन वरांत सुमार अडेज इंच पावसाची नोंद जाली. वाळपय सरकारी हॉस्पिटल आनी बाजारांतल्या हनुमान देवळाच्या वाठारांत व्हडा प्रमाणांत उदक जमा जाल्ल्यान रस्त्या वयल्यान वाहना व्हरप कुस्तार जालें. देवळा कडेन आशिल्ल्या कांय घरांनी उदक रिगलें तरी लुकसाण जालें ना. ह्या पावसाक लागून लुकसाण जालें ना अशी म्हायती वाळपयच्या उजो पालोवपी दलाच्या कार्यालयांतल्यान मेळ्ळी.
वाळपय सामाजीक हॉस्पिटला कडेन वाळपय कोर्ट मेरेनचो सुमार 300 मीटर रस्तो उदका खाला गेल्लो. ताका लागून येरादारी बंद पडली. उदकांतल्या वाट काडत वचपी कांय चारचाकी आनी दुचाकी मदीं बंद पडल्यो.
फाटल्या पंदरा दिसां सावन पावस पडत आशिल्ल्यान सत्तरी तालुक्यांतल्यो न्हंयो पर प्रवाहीत जाल्यात. घाटमाथ्यार व्हडा प्रमाणात पावस पडत आसा. ताका लागून न्हंयात खोदूळ उदक येवपाक लागलां. दाबोस हांगच्या उदका प्रकल्पाचेर ताचो परिणाम जावपाची शक्यताय आसा. रस्त्यार उदक जमा जाल्ल्यान तें व्हावन वचपा खातीर धाडिल्ल्या पालिकेच्या कामगारांनी बरें काम केलें. ताका लागून उदक रोकडेंच उणे जालें अशें वाळपयची नगराध्यक्ष सेहझीन शेख हिणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
