भांगरभूंय | प्रतिनिधी
आयज कार्तिक पुनव. आयज शीख समाजांतले भाव- भयणी श्री गुरू नानक देवजी हांचो जल्म मनयतात. आयज तांची 554 वी जयंती. ते निमतान विशेश लेख.
श्रीगुरू नानक देवजीचो जल्म 15 एप्रिल 1469 दिसा जालो, पूण शीख धर्माचे अनुयायी तांचो जल्म कार्तिक पुनवे दिसाच मनयतात. नानक देवजी शीख धर्माचे संस्थापक आनी पयले गुरू. सध्याच्या पाकिस्तानांतल्या लाहोरा लागसारच्या तलवंडी हांगाच्या हिंदू घराण्यांत गुरू नानक देवजी हांचो जल्म जालो. आयज लेगीत ह्या गांवाक नानकाना साहिब म्हणटात. तें तिर्थक्षेत्र जालां. गुरू नानक हांचो जल्मदीस प्रकाश पर्व म्हणूनय मनयतात. गुरू नानक देव भुरगेपणा सावन धर्मीक आशिल्ले, पूण कर्मकांड आनी बुरसटिल्ल्या विचार तांकां ते पिरायेरूय मान्य नाशिल्ले. देखूनच मुजी वेळार तांणी जानवें घालपाक स्पश्ट न्हयकार दिलो. हिंदू धर्मांतलीं कर्मकांडां, त्या काळा वयले बुरसटिल्ले विचार, अनिष्ट चालीरिती, असमानताय, जातीभेद आनी बायलांक मेळपी वायट वागणूक तांकां मान्य नाशिल्ली. ताकाच लागून ज्ञानप्राप्ती उपरांत तांणी शीख धर्माची थापणूक केली.
शीख धर्माचो प्रचार आनी प्रचार करपा खातीर तांणी संवसारभर भोंवडी केली. ह्या वेळार तांणी संवसारभरांतल्या जायत्या धर्मीक थळांकय भेट दिली. त्या काळांत तांणी भारतांतल्या धर्मीक थळांकच न्हय तर इराकांतल्या बगदाद आनी सावदी अरेबियांतल्या मक्का, मदीना ह्या धर्मीक थळांकय भेट दिली. ह्या काळांत तांणी शीख धर्माच्या तत्वांचो प्रचार आनी प्रचार केलो. सामान्य लोकां मदीं देव आनी धर्मा विशीं जागृताय निर्माण करपा वांगडाच हिंदू- मुसलमान एकचाराचोय संदेश दिलो.
तांणी स्थापन केल्ल्या शीख धर्माचे उदात्त, समतावादी शिकवणेक लागून तो भारतांतच न्हय तर संवसारभर रुजलो. आयज शीख धर्म फकत आशियांतच न्हय तर युरोप, कॅनडा आनी अमेरिकेंतय पाळटात. शीख धर्माक संवसारांतल्या मुखेल धर्मां मदीं वळख मेळ्ळ्या. गुरू नानकाक मानवतावादाचेर खर विस्वास आशिल्लो. ताचें विचार धर्माच्या सत्य आनी शाश्वत मुल्यांचें मूळ आशिल्ले. देखून सगळ्यांनी जात आनी धर्म हाचे पलतडी वचून एकठांय येवचें, मनीस म्हणून एकठांय रावचें, अशी तांची इत्सा आशिल्ली. सगळे मनीस एकेच आवयचीं भुरगीं आसून तातूंतलो कोणूच श्रेश्ठ वा उण्या दर्जाचो ना अशें तांचें स्पश्ट मत आशिल्लें. जाती आनी धर्म हांचे मदलो भेद तर तांकां मान्य नाशिल्लो. ना हिंदू, ना मुसलमान, सगळे मनीस, अशी घोशणाच तांणी दिल्ली. एकवट, श्रध्दा आनी मोग हें तत्वगिन्यान तांणी मांडलें. तशें पळोवंक गेल्यार ते क्रांतीकारी विचारवंत आशिल्ले. ताच्या विचारांक लागूनच शीख धर्म परदेशांत गेलो. श्रीगुरू नानक देवजी हांचें महानिर्वाण 22 सप्टेंबर 1539 दिसा जालें. गुरू नानक देवजीक ताच्या जयंती दिसा नमळायेचें अभिवादन.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
