भांगरभूंय | प्रतिनिधी
भगवान ब्रह्मा सृश्टीकर्त्याची आनी विष्णु संरक्षकाची भुमिका करता जाल्यार शिव हो मुळांतूच नाशक अशें म्हण्टात. हे तीन प्रभु एकठांय येवन सैमाच्या नेमाचें प्रतीक आसात, जें म्हळ्यार निर्माण जाल्ली हर एक गजाल निमाणें नश्ट जाता.
देव शिव हो स्वयंभु! कांयच नासतना ते थंय आशिल्ले आनी सगळो संवसार नश्ट जाले उपरांत लेगीत ते सतत उरतले. ‘नम: शिवाय’ ह्या पांच अक्षरांच्या मंत्राचो अर्थ “मोक्ष दिवपी आणि पाप नाश करपी” असो आसा. हें बरयतना म्हाका “ शिवजी,भस्मासुर आणि मोहिनी” काणी याद जाता…
हिमालयांत भस्मासुर नांवाचो एक राक्षस आशिल्लो, जो शिवाक प्रसन्न करपा खातीर वर्साचीं वर्सां ध्यानांत रावतालो. ताचे भक्तीन प्रसन्न जाल्लो शिव ताचे मुखार प्रगट जाता आनी ताका एक इत्सा मागपाक सांगता.
हुशार भस्मासुर सांगता, “प्रभु, हांव उजव्या हातान जाका कित्याक हात लायतलों तें रोखडेंच भस्म जातलें, असो वर म्हाका दी.” राक्षसाच्या वायट हेताची जाणविकाय नासतना शिव वर दिता.
भस्मसुराचो हेतू स्वता महादेवांचेर वराची परिक्षा घेवप आनी शिवाक भस्म करून परमशक्त मेळोवपाचो आसता. भगवान विष्णु हें साक्षी जावन शिवाक राक्षसा पसून वाटावपाचें थारायतात. विष्णु मोहिनी नांवाचे सोबीत बायलेंत रुपांतरीत जाता आनी भस्मासुरा मुखार प्रगट जाता. मोहिनीची मंत्रमुग्ध करपी सोबीतकाय पळोवन भस्मासुर तिच्या मोगांत पडटा. मोहिनी भस्मासुराक सांगता की ताणें तिचे भशेन नाचून, तिका हारयली जाल्यार आपूण तूजे कडेन लग्न जातलीं.
भस्मासुर हें मान्य करता आनी मोहिनीच्या दर एका पावलाक पावल घेवन वता. ताचो आत्मविस्वास वाडत वता तसो मोहिनी आपलो उजवो हात तकलेर दवरून एक पावल घालता. अतिविस्वास आशिल्लो राक्षस आपल्या वराक विसरून उजवो हात तकलेर दवरता आनी रोखडोच भस्म जाता.
भगवान शिवाक नटराज अशेंय म्हण्टात, जाचो संस्कृतांत अर्थ ‘नाचाचो स्वामी’. ह्या रुपांत ताचें चित्रण ब्रह्मांडीय नर्तक म्हणून केल्लें आसून ताचें प्रतिनिधित्व धातूंत वा फातरांत केलां.
भस्मासुर आणि मोहिनी कथेंतल्यान मेळिल्ली नैतिकताय म्हळ्ळ्यार भस्मासुर आणि मोहिनी कथा आमकां शिकयता की बुद्धीचो वापर आमी बरे तरेन करूंकना जाल्यार परिणाम वायट जातलो. संकश्टान आशिल्ल्या मनश्याची सदांच मदत करपाक जाय. विष्णु आनी शिव हांचे मदले कथेंत खरी इश्टागत दाखयल्या. कथांत शिवान भस्मासुराची इत्सा पुराय करून ताका एक शक्त दिली, जिचो ताणें गैरवापर केलो. अशे तरेन काणयेंतल्यान आनीक एक म्हत्वाचो धडो म्हणल्यार, अविश्वसनीय आणि सुवार्थी मन्श्याक आमी केन्नाच लागी करूंक फावना.
– अक्षदा सावंत देसाय
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
