भांगरभूंय | प्रतिनिधी
शरद केळकर आनी महेश मांजरेकर हांचे उपरांत आतां शाहीद कपूर लेगीत छत्रपती शिवाजी महाराजांची भुमिका साकार करतलो. शाहीद बेगिनूच ‘ओ माय गॉड 2’ फेम दिग्दर्शक अमीत रायच्या फुडल्या चित्रपटांत शिवाजी महाराजांचे भुमिकेंत दिसतलो, अशी चर्चा चल्ल्या.
ह्या चित्रपटा खातीर शाहीद तशेंच निर्मात्यांनी राणा दग्गुबुती कडेन लेगीत संपर्क केला. तातूंत तो औरंगजेबाची भुमिका रंगयतलो.
डिसेंबर 2024 मेरेन हो चित्रपट फ्लोराचेर वचपाक शकता. दक्षिणेचो नामनेचो निर्मातो दील राजू हांची ही निर्मिती आसतली.
मेळिल्ले म्हायती प्रमाण चित्रपटांतल्या औरंगजेबाचे भुमिके खातीर राणा दिग्दर्शक अमीतची पयली पसंती आसा. मात हाचेर निमाणी चर्चा जावप उरल्या. शाहीद लेगीत ही व्यक्तीरेखा साकारपाक खूब इत्सूक आसा.
सध्या निर्माते चित्रपटाची संहिता तशेंच ताच्या प्री- प्रॉडक्शनाक अंतीन रूप दिवपांत व्यस्त आसा. डिसेंबर मेरेन ताचें शुटींग सुरू जावं येता.
शिवरायांचे व्यक्तीरेखे खातीर शाहीद कपूरान तयारी सुरू केल्ल्याची म्हायती गोपांतल्यान मेळ्ळ्या. जिवितांतली एक भांगराची संद म्हूण तो हे भुमिके कडेन पळयता.
हो चित्रपट छत्रपती शिवरायांचे जिणे भोंवती विणला. मात हो तांचो बायोपीक आसचो ना, अशी खबर मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
