भांगरभूंय | प्रतिनिधी
वास्को: शिक्षणीक संस्थांनी नोकरी सोदपी विद्यार्थी तयार करिनासतना, नोकरी दिवपी जावचे हे खातीर यत्न करपाची गरज आशिल्ल्याचें उलोवप हिमाचल प्रदेशाचे राज्यपाल राजेंद्र आर्लेंकार हांणी केलें. शिक्षणाची वेवस्था ही समाजाच्या गरजांचेर आदारीत आसूंक जाय. नव्या शिक्षणीक धोरणाचेर चर्चासत्र आयोजीत करपाची गरज तांणी उक्तायली.
झुआरीनगरांतल्या एमईएस कला आनी वाणिज्य म्हाविद्यालयाच्या भांगरा उत्सवी वर्साच्या उक्तावण सुवाळ्यांत राजेंद्र आर्लेंकार मुखेल सोयरे ह्या नात्यान उलयताले.
ह्या वेळार माचयेर प्राचार्य डॉ. मनस्वी कामत, संस्थेचे अध्यक्ष आनी संस्थापक प्राचार्य एमएस कामत, उपाध्यक्ष भास्कर नायक, भांडारी ललिता जोशी, अनघा आर्लेंकार हाजीर आशिल्ले.
आर्लेंकार हांणी एमईएस म्हाविद्यालयांत शिकतना आयिल्ले अणभव सांगलें. ह्या म्हाविद्यालयांत विद्यार्थ्यांनी फक्त पदवीच मेळयिल्ली ना, जाल्यार मुल्यां, नीतिमत्ता, नैतिकताय बी संस्कार तांचेर केले अशें तांणी सांगलें.
प्राचार्य डॉ. मनस्वी कामत हांणी येवकार दितना म्हाविद्यालयाच्या 50व्या गौरवशाली वर्साचो नियाळ घेतलो. वसंतराव (अण्णा) जोशी हांणी 1972 वर्सा म्हाविद्यालयाची बुन्याद घाले उपरांतच्या काळांत जाल्ल्या विवीध घडामोडींचेर डॉ. कामत हांणी उजवाड घालो.
भांगरा महोत्सवी वर्स समितीचे अध्यक्ष डॉ. चंपा परब हांणी वर्सभरांतल्या नियोजीत उपक्रमांची म्हायती दिली. कॉलेज स्टाफ क्लबाचे सचीव डॉ. फ्रेडा कोटा ई परेरा हांणी सोयऱ्यांची वळख करून दिली. एमएस कामत आनी प्राचार्य डॉ. मनस्वी कामत हांचे हस्तुकीं राजेंद्र आर्लेंकार आनी तांची घरकान्न अनघा आर्लेंकार हांचो भोवमान केलो. आर्लेंकार हांचे हस्तुकीं म्हाविद्यालयाच्या संस्थापक वांगड्यांच्या कुटुंबांचो आनी पयल्या वेवस्थापकी समितीचो भोवमान केलो.
ह्या वेळार एमएस कामत, भास्कर नायक हांचींय उलोवपां जालीं. उपप्राचार्य आशीश जोशी हांणी उपकार मानले. डॉ. ए. सुसान डेबोराह हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
