भांगरभूंय | प्रतिनिधी
भांगरभूंय । प्रतिनिधी
दिवचलः फाटल्या कांय म्हयन्यां सावन दिवचल तालुक्यांतल्या सोनारभाट, लाडफें, नानोडा आनी अडवलपाल वाठारांत तिळारी धरणाचें उदक मेळपाचें बंद जाल्ल्यान शेतां, बागायती आनी पोरसां करपून वचपाची भिरांत शेतकारां मदीं पातळ्ळ्या. उदका पुरवण बेगोबेग परत सुरू करून लुकसाण जावपा पसून वाटावचें अशी मागणी तांणी सरकारा कडेन केल्या.
सरकारान केल्ल्या आवाहनाक मान दिवंन शेतकारांनी पडंग आशिल्ले जमनींत भाता वांगडा मिरसांगेचें पीक घेवपाक सुरवात केल्ली. मात तिळारीच्या खारजांतल्यान उदक नेमान येना जाल्यार कांय फावटे नाच्च जाता. सध्या उदक नाशिल्ल्यान हाता कडेन आयिल्लें पीक करपून वचपाच्या मार्गार आशिल्ल्यान शेतकार भियेल्यात. अडवलपाल वाठारांत उदक नाशिल्ल्यान माडयेच्यो सुपारी गळून पडपाक लागल्यात.
पोरूं ह्याच म्हयन्यांत तिळारीचे उदक येवपाचें बंद जातगीर डॉ नंदकुमार कामत आनी थळाव्या लोक प्रतिनिधींनी फाटपुरवण करून उदक सुरू केल्लें. सध्या दिवचलचो आमदार डॉ चंद्रकांत शेट्ये हांणे उदकास्रोत खात्याच्या अधिकाऱ्यांची ताकतिकेन बसका घेवंन उदकाची पुरवण करपा खातीर यत्न करपाची तांकां सूचोवणी केली. सोनारभाट- लाडफें, नोनोडें, अडवलपाल, साळ, मुळगांव वाठारांत शेतकार पावसाळी पिका वांगडा गिमांत भाजी, मिरसांगेचें पीक घेतात. मार्च- एप्रील म्हयन्यांत उदक मेळ्ळें ना जाल्यार खर्च करून केल्ली लागवड वाया गेल्यार तांकां अर्थीक लुकसाण जावपाची शक्यताय आसा.
तिळारीच्या खारज्याक जायते कडेन गळटी लागल्या. ताका लागून उदका पुरवण सारकी जायना. डॉ शेट्येन लाटंबारशें पंचायत सभाघरांत शेतकार आनी उदकास्रोत खात्याच्या अधिकाऱ्यांची बसका घेवंन खारजाची दुरुस्ती करून तांकां उदकाची गळटी थांबोवपाक उपाय येजवण करपाक सांगलें. बसकेक अभियंतो मल्लिकार्जुन, पालवी अभियंतो माजिक, कार्यकारी अभियंतो मिलिंद गावडे, सरपंच पद्माकर मळीक, बाबासाहेब राणे, संतोष कळंगुटकार हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
