भांगरभूंय | प्रतिनिधी
श्रीरंग बर्वे: सरकारी मुळावें विद्यालय ठाणे सत्तरींत स्नेहसंमेलन उमेदीन
वाळपय: शाळा ही गांवचे उदरगतीची बुन्याद. ठाणे शाळेंतल्या विद्यार्थ्यांचो आंकडो वट्ट 60 ते 70 आसा ही खोशयेची गजाल. पालक आनी शिक्षकांनी एकामेकांच्या विश्वासान भुरग्यांची आनी शाळेची उदरगत करची, अशें सत्तरी म्हालाचे भाग शिक्षणाधिकारी श्रीरंग बर्वे हांणी सांगलें.
सरकारी मुळावें विद्यालय ठाणे सत्तरी हे शाळेची इनामां भेटवण आनी स्नेहसंमेलन कार्यावळ डोंगुर्ली ठाणे ग्रामपंचायतीच्या सभाघरांत जाली. ह्या वेळार बर्वे मुखेल सोयरे म्हणून उलयताले.
हे कार्यावळीक अखील गोंय मुळावे शिक्षक संघाचे अध्यक्ष प्रकाश गांवकार, सरकारी माध्यमीक विद्यालयचे मुख्याध्यापक काशिनाथ नायक, ठाणे डोंगुलीची सरपंच सरीता फटगो गांवकार, शाळा वेवस्थापन समितीची अध्यक्ष सानवी संदीप गांवकार, सांस्कृतीक कार्यावळ समितीची अध्यक्ष ज्योती उमेश खोत आनी शाळेची कार्यकारी मुख्याध्यापिका सरोजिनी भिवा गांवकार आनी हेर मानेस्त हाजीर आशिल्ले.
मानेस्तां हस्तुकीं दिवली पेटोवन कार्यावळ सुरू जाली. विद्यार्थ्यांनी ह्या वेळार येवकार गीत सादर केलें.
मुख्याध्यापक काशिनाथ नायक, प्रकाश गांवकार हांणी ह्या वेळार आपले विचार मांडले. वर्सभर विद्यार्थी आनी पालकां खातीर घेतिल्ल्या विवीध सर्तींचीं इनामां मानेस्तां हस्तुकीं भेटयलीं. उपरांत सांस्कृतीक कार्यावळी सादर केल्यो. आदर्श शिक्षक पुरस्कार फावो जाल्ले खातीर शिक्षका सरोजिनी गांवकार हिचो ह्या वेळार भोवमान केलो.
सुरवातेक कार्यावळींचें सुत्रसंचालन शिक्षिका नसिमा पारिशवाड़ी हांणी केलें. वर्सुकी अहवाल सरोजिनी गांवकर हांणी सादर केलो. इनामां भेटवणीची जापसालदारकी सुवर्णा पिंगुळकार हांणी सांबाळ्ळी उपकार मनिषा गावस हांणी मानले. सांस्कृतीक कार्यावळीचें सुत्रसंचालन मिथिला गांवकार हांणी सेलें.ह्या स्नेहसंमेलनांत विद्यार्थी शिक्षक, पालक आनी ग्रामस्थ व्हडा संख्येन हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
