भांगरभूंय | प्रतिनिधी
-विद्यार्थी मारपेट प्रकरण: एका शिक्षिकेक अटक, दुसरे शिक्षिके आड गुन्यांव
– दोन म्हयन्यांत मारपेटीच्यो दोन घडणुको, पालकां मदीं हुस्को
पणजी : शिक्षकां कडल्यान विद्यार्थ्यांक मारपेट जावपाचे प्रकार अजून सुरू आसात. विठ्ठलापूर सांखळेंतल्या प्राथमीक शाळेंतल्या विद्यार्थ्याक शिक्षिकेन थापट मारपाची घडणूक घडल्या. हे शिक्षिके आड दिवचल पुलिशेंत गुन्यांव नोंद केला. तशेंच आनीक एके शिक्षिकेक विद्यार्थीनीक मारपेट करपाच्या प्रकरणांत सांखळेतल्या विद्यालयाच्या शिक्षिकेक पुलिसांनी ताब्यांत घेतल्या.
ह्यो दोनूय घडणुको वेगळ्यो आसल्यो तरी त्यो सांखळेतल्याच शिक्षण संस्थांनी घडल्यात. विठ्ठलापूर – सांखळे सरकारी प्राथमीक शाळेंत आपल्या भुरग्याचेर थापट मारिल्ल्याची कागाळ ताच्या आवयन पुलिशेंत केल्या. ही घडणूक शाळेंत 25 नोव्हेंबराक घडली, अशें कागाळेंत नोंद केला. पुलिसांनी भारतीय दंड संहितेचें कलम 323 आनी बाल हक्क कायद्याचें कलम 8 (2) खाला गुन्यांव नोंद केला. मजगतीं, आपणे विद्यार्थ्याक थापट मारूंक ना, अशे शिक्षिकेन म्हणला.
सांखळे विद्यालयांतली घडणूक
सांखळे विद्यालयांत एके विद्यार्थीनीक मारपेट करपाच्या गुन्यांवा खातीर एके शिक्षिकेक ताब्यांत घेतल्या. मारपेटीची ही घडणूक 9 सप्टेंबराक जाल्ली. पुलिसांनी कलम 323 आनी बाल हक्क कायद्याचें कलम 8 (2) खाला गुन्यांव नोंद केला. पुलिसांनी सोमारा सदर शिक्षिकेक चवकशे खातीर ताब्यांत घेतले. पुलीस उपअधिक्षक सागर एकोस्कार, निरिक्षक राहुल नायक हांचे फुडारपणा खाला बायलां पुलीस उपनिरिक्षक मारिया रिबेरो फुडलो तपास करता. विद्यार्थीनीच्या पालकांनी कागाळ नोंद केले उपरांत पुलिसांनी तपास सुरू केला.
दोन म्हयन्यांत विद्यार्थ्यांक मारपेट जावपाच्यो दोन घडणुको घडिल्ल्यान विद्यार्थ्यांच्या पालकांनी हुस्को उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
