भांगरभूंय | प्रतिनिधी
विलिनीकरण शिक्षक, पालकांक विस्वासांत घेवनूचः मुख्यमंंत्री
भांंगरभूंंय I प्रतिनिधी
पणजी : पालक आनी शिक्षकांंक विस्वासांत घेवन सरकार मुळाव्या शाळांंचें विलिनीकरण करतलें. बंंद पडपी मुळाव्या शाळांंचो हुस्को सरकाराक आसा, अशें मुख्यमंंत्री डॉ. प्रमोद सावंंत हांंणी सांंगले. अखील गोंय मुख्याध्यापक संंघटणेचे परिशदेंत मुख्यमंत्री उलयताले.
बऱ्याच शाळांंनी फक्त 8 ते 10 विद्यार्थी आसात. ह्या विद्यार्थ्यां खातीर फक्त एकूच शिक्षक कार्यरत आसा. दिसभर चार वर्ग एकूच शिक्षक कितें म्हूण शिकयतलो? हाचो विचार सगल्यांनी करपाक जाय. चारूय वर्गांक एक शिक्षक शिकोवपा परस ती शाळा लागसारच्या शाळेंत विलीन करप योग्य. मुळाव्यो शाळा बंद जातात, ताचो हुस्को सरकाराक आसा. थळाव्या पालकांंनी विद्यार्थ्यांक पयसुल्ल्या शाळेंत घातले, जाल्यार मुळाव्या शाळांक विद्यार्थी कशें मेळटलें?, अशें मुख्यमंंत्र्यान सांगलें.
सरकाराक खंयचीच शाळा बंद करपाची इत्सा ना. विलिनीकरण जाल्ल्या शाळांंची जापसालदारी लेगीत सरकाराचीच आसतली. आतां शिक्षण संंस्थांंनी अांगणवाडी दत्तक घेवच्यो, असो सरकाराचो प्रस्ताव आसा. विद्यालयां लागसार जी अांगणवाडी आसा, थंय एका शिक्षकाक धाडपाक हरकत ना. ह्या अांगणवाडीतलेच भुरगें उपरांत विद्यालयांनी येतलें, अशें मुख्यमंत्र्यान सांगलें.
विद्यालयांनी ऑक्टोबर सावन कोडींग आनी रोबोटिक्स अभ्यासक्रम सुरू जातलो. विद्यार्थ्याच्या कामगिरीचेर नदर दवरपा खातीर विद्या समिक्षा केंद्रांची स्थापणूक जातली. विद्यार्थी तशेंच शिक्षकांचेर विद्या समिक्षा केंद्रां वरवीं नदर दवरतले, अशें मुख्यमंंत्र्यान सांंगलें.
शाळांची जातली सर्वांगी उदरगतः मुख्यमंत्री
शाळा विलिनीकरणा सध्या जायते पालक विरोध करतात. मुख्यमंत्री ह्या नात्यान आपलीय तशी इत्सा ना. पूण विद्यार्थ्यांच्या पर्जळीत फुडारा खातीर हो निर्णय घेवचोच पडटलो. ज्या शाळांचे विलिनीकरण जातलें त्या शाळांच्या सर्वांगी उदरगतीची पुराय जापसालदारकी सरकाराची आसतली. शिक्षण खात्याचे अधिकारी हे विशीं पालक आनी शिक्षकां कडेन चर्चा करतात. सगल्यांक विस्वासांत घेवनूच फुडलो निर्णय घेतले, अशें मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
