भांगरभूंय | प्रतिनिधी
पणजीः कोंकणी भाशा मंडळ आयोजीत 21व्या शणै गोंयबाब कथामाळेची मुळावी फेरी 20 ऑगस्टाक जातली. जिल्हो पांवड्या वयल्यो फेरये 28 ऑगस्टाक सकाळीं 9 वरांचेर कोंकणी भाशा मंडळांत जातल्यो. त्याच दिसा सांजे वेळार राज्य पांवड्या वयली सर्त जातली, अशें कोंकणी भाशा मंडळान कळयलां.
केंद्रीय पांवड्या वयली सर्त वट्ट 16 केंद्रांनी चलतली. 12 म्हालांतल्या 12 केंद्रांचेर तशेंच कुंकळ्ळी, म्हापशें, फोंडें आनी मडगांव मेळून वट्ट 16 केंद्रांचेर ही सर्त जातली. साश्ट आनी केपें म्हालांतल्या कांय विद्यालयांचो आस्पाव कुंकळ्ळी केंद्राचेर केला. वट्ट 150 परस अदीक परिक्षक आनी 250 परस अदीक आपवावुरपी ही सर्त येसस्वी करपाक वावुरतले, अशें आयोजकांनी कळयलां.
आयोजकांनी हालींच शिक्षक, परिक्षक तशेंच म्हाल संयोजकां खातीर खासा कार्यशाळा घेतिल्ली. तातूंत तांकां सर्तीचो हेतू तशेंच सर्तीचे नेम सांगल्यात. ही कथामाळ यत्ता पयली ते चवथी, पांचवी ते सांतवी आनी आठवी ते धावी अशा तीन गटांनी घेतले. सगळ्या स्पर्धकांक प्रशस्तीपत्रकां आनी केंद्रा वयल्या जैतिवंतांक पुस्तक रुपान इनामां भेटयतले.
केंद्रीय पांवड्याचेर जावपी सर्तींत दरेका गटांत जर 15 मेरेन स्पर्धक वांटेकार जाले जाल्यार तांचे मदले दोम जैतिवंत आनी उपरांतच्या दरेका 15 स्पर्धका फाटल्यान आनी एक जैतिवंत वेंचून काडटले, असो नेम आसलो तरीय कितले स्पर्धक निमाण्या पांवड्याचेर वेंचून काडप हाची पुराय मेकळीक आयोजकांनी परिक्षकांक दिल्या.
अंदूं आयोजकांनी गंयांतल्या सगळ्या विशेश शाळांक आमंत्रण दिलां. सर्तींत वांटेकार जावपी सगळ्या विशेश विद्यार्थ्याक इनामां दितले. कोंकणी भाशा मंडळान गोंयांतल्या 16 य केंद्रांचेर खाशेलें पुस्तक प्रदर्शनाचें आयोजन केलां. ह्या प्रदर्शनांत कोंकणी भाशा मंडश तशेंच हेर प्रकाशकांची बाल साहित्य पुस्तकां विकपाक दवरतले. कथाकथन सर्ती संबंदीची सगळी म्हायती आनी नेम सगळ्या मुळाव्या आनी माध्यमीक शाळांनी पावयल्यात. तशेंच कोंकणी भाशा मंडळाचे www.konkanibhashamandal.com हे वेबसायटीचेर उपलब्ध आसात. अदीक म्हायती खातीर सर्तीचे संयोजक पलाश अग्नी (7350426399), सहसंयोजक शलाका देसाय (9049750869) हांचे कडेन संपर्क करचो, अशें आयोजकांनी कळयलां.
सर्तीचें पुराय वेळापत्रक फुडें दिल्ले प्रमाण. 20 ऑगस्टाक सकाळीं 9 वरांचेर केंद्र धारबांदोडें (थळ- गोमंतक विद्यालय, पिळयें, धारबांदोडें), केंद्र सांगें (थळ- युनीयन हायस्कूल, सांगें), केंद्र काणकोण (थळ- श्रध्दानंद विद्यालय, काणकोण), केंद्र सत्तरी (थळ- सरकारी विद्यालय, भुंयपाल), केंद्र मडगांव 1 (थळ- कोंकणी भाशा मंडळ, मडगांव), केंद्र मडगांव 2 (थळ- कोंकणी भाशा मंडळ, मडगांव), केंद्र पेडणें (थळ- ए.डी.ई.आय कार्यालय, पेडणें), केंद्र तिसवाडी (थळ- कला आनी संस्कृती संचालनालय, पाटो, पणजी), तशेंच 20 ऑगस्टाक दनपारां 2 वरांचेर केंद्र फोंडें 1 (थळ- जीव्हीएम्स् मुळावें विद्यालय, फोंडें), केंद्र फोंडें 2 (थळ- जीव्हीएम्स् मुळावें विद्यालय, फोंडें), केंद्र कुंकळ्ळी (थळ- सी. ई. एस महाविद्यालय, कुंकळ्ळी), केंद्र केपें (थळ- सर्वोदया स्कूल, कुडचडें सरकारी म्हाविद्यालय, केपें), केंद्र मुरगांव (थळ- सँट अँन्ड्र्यु हायस्कूल, वास्को), केंद्र दिवचल (थळ- अवर लेडी ऑफ ग्रेस हायस्कूल, दिवचल), केंद्र म्हापशें 1 (थळ- जी. एस. आमोणकार विद्यामंदीर, म्हापशें आनी केंद्र म्हापशें 2 (थळ- जी. एस आमोणकार विद्यामंदीर, म्हापशें).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
