भांगरभूंय | प्रतिनिधी
काणी काणी कोतवा, म्हातारेच्या नातवा… आजी नातरांक काणयो सांगताली आनी नातरां गुंग जावन काणयो आयकतां आयकतां न्हिदून पडटालीं. आतां बदलत्या काळा वांगडा आधुनीकतायेचीं सोपणां चडटना त्यो काणयो शेणत चल्ल्या. आजयेच्यो काणयो आयकून न्हिदचे बदला भुरग्यांक मोबायलाची गरज पडटा. अशा वेळार काणयो भुरग्यां मदीं उरच्यो म्हण धडपड करपी आमच्या कोंकणी भाशा मंडळाच्या कार्याची तोखणाय करन दिसता. शणै गोंयबाब कथामाळ ही भुरग्यां खातीर काणयाची सर्त फाटलीं 21 वर्सां सातत्यान गोंयभर कोंकणी भाशा मंडळ घडोवन हाडटा.
21 वर्सां पयलीं म्हळ्यार सादारण 2001-2002 वर्सा कोंकणी भाशा मंडळान ही सर्त सुरू केली. वर्सां वता तशी हे सर्तीक भुरग्यांचो प्रतिसाद वाडत गेलो. सुरवेक कांय वेंचीक तालुक्यांनी 100 ते 200 वांटेकार सर्तकांक घेवन सुरू जाल्ली ही सर्त. आयज हे सर्तींत वांटो घेवपी सर्तकांचो आंकडो शालेय पांवड्यार 10 हजार जाल्यार केंद्रीय पांवड्यार लागीं लागीं 1100चेर पावला. सुरवेक 11 दीस वेगवेगळ्या केंद्रांनी जावपी ही सर्त आयज एकाच दिसा एकूण 16 केंद्रांनी जाता. कांय केंद्रांनी तर एकूण 100 ते 200 भुरगीं वांटेकार जातात. अंदूं 21व्या वर्सा कथामाळेक मेळिल्लो प्रतिसाद विक्रमी आशिल्लो. कोंकणी भाशा मंडळ येता त्या वर्सा केंद्रांची संख्या आनीक वाडोवपाचो विचार करता.
आयज शणै गोंयबाब कथामाळ हे सर्तीक एक प्रतिश्ठा प्राप्त जाल्या. शणै गोंयबाब कथामाळ लागीं पावली की भुरग्यां सयत पालक शिक्षक लेगीत काणयो सोदपाच्या कामाक लागतात. वेगवेगळीं पुस्तकां चाळटात. बर्यांतली बरी काणी आपल्या भुरग्याक दिवन तांचे कडल्यान उत्कृश्ट सादरीकरण करून घेवपाचे तयारेक लागतात. एकुणूच शणै गोंयबाब कथामाळेच्या आयोजनाक लागून कोंकणी भास वाडीक लागपाक फायदो जाता. कोंकणीक लागीं नाशिल्ले खूबशे भुरगे, पालक, शिक्षक ह्या निमतान लागीं येतात. कांय पालक तर कोंकणी लेखकां कडेन संपर्क सादून तांचे कडल्यान काणयो बरोवन घेतात. अशे तरेन शणै गोंयबाब कथामाळेच्या निमतान नव्यो काणयो जल्माक येतात. कांय फावटीं तर पालक/शिक्षक स्वता काणयो बरोवन भुरग्यांक दितात आनी हे सर्ती निमतान आपसुकूच कोंकणीच्या कथा ह्या साहित्य प्रकारांत भर पडटा. कोंकणीच्या कथा साहित्याच्या मळार शणै गोंयबाब कथामाळ ही भोव म्हत्वाची सर्त. हातांत कागद घेनासतना काणी समजून घेवन लोकां मुखार उबें रावन सांगपाचें कसब हे सर्तीक लागून भुरग्यां भितर तयार जाता. आनी नकळत ती काणी त्या भुरग्यांचेर संस्कार करता. भुरग्यांक ते काणयेंतल्यान बोध मेळटा.
फाटल्या धा वर्सां सावन परिक्षक वा संयोजक ह्या नात्यान शणै गोंयबाब कथामाळेचें आयोजन लागींच्यान पळोवपाची आनी अणभवपाची संद म्हाका मेळटा. वर्सागणीक शणै गोंयबाब कथामाळेक मेळपी भुरग्यांचो वाडटो प्रतिसाद हांवें पळयला. दर वर्सा सर्त आनीक बरे तरेन कशी जातली हाची धडपड करपी भाशा मंडळाच्या जाळवणदारांकय हांवें धडपडटना पळयल्यात. रात-दीस एक करून कोंकणी भाशा मंडळाचे वांगडी ही सर्त जैतीवंत करपाक वावुरतात. आनी म्हजेय हातांतल्यान केंद्रीय पांवड्यार फूल ना पाकळेचो वावर हे सर्तीच्या आयोजनांत जाता हाचेंय म्हाका समाधान आसा.
कोंकणी फुलची, भुरग्यांच्या ओंठार घोळची हो प्रामाणीक उद्देश घेवन कोंकणी भाशा मंडळान ही सर्त सुरू केल्ली आनी आयज 21 वर्सांच्या अखंडीत वाटचाली उपरांत कोंकणी भाशा मंडळ आपल्या उद्देशांत बर्या पैकीं यशस्वी जायत आसा हें हे सर्तीक वर्गांगणीक मेळिल्लो वाडटो प्रतिसाद पळयल्यार दिसून येता. आयच्या मोबायलाच्या युगांत जंय वाचन संस्कृती शेणत चल्ल्या त्या काळांत भुरग्यां भितर वाचन संस्कृती टिकोवन दवरपाचें म्हत्वाचें काम शणै गोंयबाब कथामाळ करता. काणयो सोदपाक लागून आपसुकूच पुस्तकां वाचप, सोदप ह्यो प्रक्रिया सुरू जातात. कांय फावट तर मराठी, इंग्लीश वा हेर भासांतल्यो काणयो कोंकणींत अणकारीत लेगीत करतात. हातूंतल्यान शणै गोंयबाब कथामाळेक प्राप्त जाल्ली प्रतिश्ठा आनी लोकप्रियता दिसून येता.
पयलींच्या काळार भुरग्यांचे बरे संस्कार जावचे ह्या उद्देशान जाण्ट्यांनी भुरग्यांक काणयो सांगपाची पद्धत अवलंबली. ते पदेर गेले ते उंडेय गेले. जाण्ट्यां फाटल्यान त्यो काणयोय गेल्यो. पूण बदलत्या काळाक जें पोशक आसा ते पद्दतीन नव्या तंत्राचो वापर करून त्यो काणयो आतां परत जित्यो करपाची गरज आसा आनी कोंकणी भाशा मंडळान ती गरज 21 वर्सां आदींच वळखून ते दिकेन पावलां मारपार सुरवातय केली. आतां गरज आसा नव्या काणयांची निर्मिती करपाची. परत परत दर वर्सा त्योच त्योच काणयो वेगवेगळ्या सर्तकां कडल्यान आयकुपाक येता हें एक परिक्षक म्हणून शणै गोंयबाब कथामाळेचें परिक्षण करतना हांवें अणभवलां. म्हणून नव्या काणयांची निर्मिती जावची तशेंच भुरग्यांची कल्पना शक्त वाडीक लागची आनी वाचपा वांगडाच भुरग्यां भितर बरोवपाचीय आवड निर्माण जावची ह्या उद्देशान कोंकणी भाशा मंडळान ल्हान काणयो म्हळ्यार लघू कथा बरोवपाची सर्त शणै गोंयबाब कथामाळे वांगडाच सुरू करपाची गरज आसा.
आमची मायभास कोंकणी पिळग्यान पिळग्यो निरंतर फुलत रावची म्हण बदलत्या काळा वांगडा आधुनीक तंत्रगिन्यानाचो आदार घेवन कोंकणी भाशा मंडळ राबत आसा. एक कोंकणी मोगी, एक नीज गोंयकार म्हणून आमी भाशा मंडळाक सहकार्य करुया आनी कोंकणी फुलोवपाक एकवटान वावरुया. कथामाळेंत वांटो घेवपी हजारां भुरग्यांतल्यान फुडाराक कांय भुरगीं लेखक जालीं जाल्यार दुदांत साखर पडिल्ले वरी जातलें आनी तें जावचें अशें म्हाका दिसता.
राधिका गुरुराज कामत सातोस्कार
9823674520
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
